QHAWARIY kay wawata sipaspa dedonta hap’ispan waqashan. Kay wawaqa Moisesmi. ¿Pitaq kay sumaq rikch’ayniyoq sipasri? Faraonpa ususinmi.

Mamanmi Moisesta pakaran kinsa killayoq kanankama, manan munaranchu egipciokuna wañuchinanta. Payqa yacharanmi Moisés tarinankuta, chay raykun kayta ruwaran qespichinanpaq.

Unu mana haykunanpaq hinan canastata ruwaran. Moisesta chaypi churaspan chay canastata saqeran Nilo mayu patapi, t’otora wiñasqan chawpipi. Moisespa panan Miriamtan niran imachus sucedesqanta karumanta qhawananpaq.

Chayllamanmi Faraonpa ususin hamuran Nilo mayupi bañakuq. Chaypin t’otorakuna ukhupi canastata rikusqa. Huknin kamachinta niran: ‘Apamuy chay canastata,’ nispa. Canastata kichaspataq munay wawachata rikuran. Moisés wawachaqa waqasharanmi, chaymi Faraonpa ususin khuyapayaran. Payqa manan munaranchu kay wawa wañuchinankuta.

Miriammi asuykuran. Dibujopi rikusqayki hina. Faraonpa ususintataq tapuran: ‘¿Waqyaramusaqchu huk israelita warmita kay wawata ñuñupunasuykipaq?,’ nispa.

‘Waqyaramuy, ama hina kaspa,’ niranmi Faraonpa ususinqa.

Chaymi Miriamqa usqhaylla mamanman willamuran. Moisespa maman hamuqtinmi Faraonpa ususinqa kayta niran: ‘Kay wawata uywapuway, pagapusaykin uywasqaykimantaqa,’ nispa.

Chhaynapin Moisestaqa kikin maman uywaran. Yuyaychayoq kaqtinñan Faraonpa ususinman pusapuran, paymi wawanta hina Moisestaqa uywaran. Chaymi Moisesqa Faraonpa wasinpi wiñaran.