QHAWARIY tawnapi wiñaq t’ikata, poqosqa almendratapas. Aaronpa tawnanmi. ¡Kay t’ikakunapas poqosqa almendrapas huk tutallapin wiñaran! ¿Ima raykun kay sucederan?

Askha watañan israelitakunaqa ch’inneq aqo pampapi purishanku. Wakinqa manan munankuchu Moisés paykunaq umallin kananta, nitaq Aarón uma sacerdote kanantapas. Chaytan yuyaykunku Coré, Datán, Abiram, llaqtapi 250 umalliq runakunapas. Llapankun Moisesta ninku: ‘¿Ima raykun qan ñoqaykuq umalliyku hina churakunki?,’ nispa.

Moisesmi nin Coreta paywan hamuqkunatapas: ‘Paqarin tutamantan apamuychis incienso q’osñichinaykichista, chaypin inciensota churankichis. Chaymanta hamunkichis Jehová Diosta yupaychana karpaman. Chaypin yachasun pitan Jehová Dios akllanqa,’ nispa.

Paqaristinmi Corepas payman sayapakuq 250 runakunapas yupaychana karpata rinku. Hukkunapas rinkun paykunaman sayapakunankupaq. Jehová Diosqa sinchitan phiñakun. Moisesmi nin: ‘T’aqakuychis kay mana allin runakunaq karpanmanta, ama imatapas paykunaqtaqa llamiychischu,’ nispa. Chayta uyarispan runakunaqa Corepa, Datanpa, Abirampa karpankumanta t’aqakuranku.

Moisesmi nin: ‘Kaywanmi yachankichis pitan Jehová Dios akllan. Allpan kicharikuspa millp’unqa mana allin runakunata,’ nispa.

Moisés rimayta tukuqtin hina, allpa kicharikun. Corepa, Datanpa, Abirampa kaqninkunapas, karpankupas, chaypi kaqkunapas llapankun chayman urmayuranku, chay qhepamantaq allpa wisq’akuran. Chay ukhuman urmayuqkunaq qaparisqanta uyarispan hukkunapas qaparinku: ‘¡Ayqesun! ¡Ñoqanchistapas allpaqa millp’uwasunmanmi!,’ nispa.

Corepas payman sayapakuq 250 runakunapas yupaychana karpaq qayllanpiraqmi kasharanku. Chaymi Jehová Dios ninata kachaykamuqtin llapanku wañuranku. Chaymantan Jehová Dios kamachiran Aaronpa churin Eleazarta, wañusqakunaq incienso q’osñichinankuta huñuspa, chaykunamanta yupaychana karpapaq llaphsa qatanakunata ruwananpaq. Yupaychana karpapaq qatanakunan israelitakunata yuyarichiran Aaronlla churikunantin Jehová Diospaq sacerdote kanankuta.

Jehová Diosqa lliwmanmi rikuchiyta munan Aaronta churinkunatapas sacerdote kanankupaq akllasqanta. Chay raykun Moisesta nin: ‘Israelpi sapanka aylluq umallinkuna tawnankuta apamuchunku. Leví ayllumantaqa Aaronmi tawnanta apamunqa. Sapanka tawnata churay yupaychana karpapi rimanakunapaq arcaq chinpanpi. Sacerdote kananpaq akllasqay runaq tawnanmi t’ikarinqa,’ nispa.

Paqaristinpaqmi, ¡Aaronpa tawnan t’ikarisqa, almendratapas poqosqata rurusqa! ¿Kunan yachankichu ima raykun Jehová Dios t’ikarichiran Aaronpa tawnanta?