EGIPTO suyumanta lloqsimusqanku iskay killa qhepata hina, israelitakunaqa Horeb sutiyoq Sinaí orqoman chayanku. Kaypin Jehová Diosqa Moisesta rimapayamuran mana ruphaq ch’aphra-ch’aphramanta. Kaypin llaqta saman; huk tiempotaq chaypi qhepakunku.

Chaypi kashaqtinkun Moisesqa orqota wichan. Chaypin Jehová Dios Moisesta nin Israel llaqtan kasukunanta, akllasqan llaqta kanankutawan. Urayamuspan Moisesqa israelitakunaman willan Jehová Diospa nisqanta. Paykunaqa munankun Jehová Diospa llaqtan kayta, ninkutaqmi kasukusaqkun, nispa.

Mana hayk’aq rikusqankutan Jehová Dios kaypi ruwan. Orqomantan q’osñita hatarichiran sinchitataqmi kunununuchiran. Runakunatan nin: ‘Ñoqan Jehová Diosniykichis kani, Egipto suyumanta horqomuqniyki,’ nispa. Chaymantan paykunata kamachin: ‘Ñoqallatan yupaychawankichis aman waq dioskunataqa,’ nispa.

Diosqa qollantaqmi israelitakunaman isqon kamachikuykunatawan. Llaqtantinmi sinchita mancharikuranku. Chaymi Moisesta ninku: ‘Qanlla rimapayawayku, wañuykumanmi ñoqaykuwan Dios rimaqtinqa,’ nispa.

Chaymantan Jehová Diosqa Moisesta niran: ‘Orqoman wichamuy. P’alta rumikunatan qomusayki, chaykunapin qelqani kamachikuy simikunata llaqta kasukunanpaq,’ nispa. Chaymi Moisesqa hukmanta wichan orqoman. Chaypin qhepakun tawa chunka p’unchay tawa chunka tuta.

Diosqa askha kamachikuy simikunata llaqtanman qon. Moisesmi chaykunata qelqaran. Diosqa qollantaqmi iskaynin p’alta rumikunatapas. Chaypin kikin Dios qelqaran llaqtaman willasqan chunka kamachikuy simikunata. Chunka Kamachikuykuna nispan sutichakun.

Chunka Kamachikuykunaqa importante kamachikuykunan. Huk kamachikuykuna qosqanpas importanten. Hukninmi nin: ‘Jehová Diosniykitan munakunayki tukuy sonqoykiwan, tukuy yuyayniykiwan, tukuy almaykiwan, tukuy kallpaykipiwan,’ nispa. Huknintaq kay: ‘Runamasiykita munakunayki qan kikiykita hina,’ nispa. Diospa Churin Jesucristo niran Israel llaqtaman qosqan chay iskay kamachikuykunaqa aswan hatunkunan, nispa. Chaymantañan astawan yachasun Diospa Churinmantapas yachachisqanmantapas.