¿CHEQAQMANTACHU chay k’aspipi mayt’usqa mach’aqway? Manan cheqaqmantachu. Cobremanta ruwasqan. Jehová Diosmi Moisesta kamachiran k’aspipi mayt’usqata sayarichinanpaq, chayta qhawaspa runakuna mana wañunanpaq. Pampapi kaqkunan ichaqa cheqaq mach’aqwaykuna. Chaykunan runata kanispa onqochiran. ¿Ima raykun chay sucederan?

Israelitakunan mana allinta rimaranku Diosmanta Moisesmantawan. Kaytan ninku: ‘¿Ima raykun Egipto suyumanta horqomuwarankiku kay ch’inneqpi wañunaykupaq? Kaypiqa manan unupas mikhunapas kanchu. Amikuykuñan sapa p’unchay maná nisqallata mikhuspa,’ nispa.

Maná nisqaqa allin mikhunan. Milagrota ruwaspan Jehová Diosqa maná nisqata unutapas qoran. Runakunan ichaqa mana agradecekunkuchu Diospa sumaq qhawarisqanta. Chay raykun Jehová Diosqa israelitakunata wanachinanpaq rikhurichiran venenoyoq mach’aqwaykunata. Mach’aqway kaniqtinmi wakinqa wañunku.

Chayraqmi runakunaqa Moisesman hamuspa ninku: ‘Huchallikuykun Jehová Diosmanta qanmantapas mana allinta rimaspayku. Qan mañakuy Jehová Diosmanta kay mach’aqwaykunata chinkachinanpaq,’ nispa.

Chaymi Moisesqa paykuna rayku mañakun. Jehová Diosmi Moisesta kamachin cobremanta mach’aqwayta ruwananpaq. Ninmi: ‘K’aspipi churanki, pipas kanisqa kaspaqa kay mach’aqwayta qhawananpaq’ nispa. Diospa nisqanta hinan Moisesqa ruwan. Chaymi mach’aqwaypa kanisqan runakunaqa cobremanta mach’aqwayta qhawaspa qhaliyanku.

Ñoqanchistapas kayqa yachachiwanchismi. Mach’aqwaypa kanisqan israelitakuna hinan llapanchispas kanchis. Llapa runakunan machuyaspa, payayaspa, onqospa wañunku. Kayqa suceden Adanwan Evawan Jehová Diosmanta karunchakusqanku raykun, llapanchispas paykunaq wawankunan kanchis. Jehová Diosmi ichaqa wiñay kawsananchispaq ñanta kichariwanchis.

Jehová Diosqa Churin Jesucristotan kay Allpaman kachamuran. Askha runakunan yuyaykuranku Jesusqa millay runa kananpaq, chay raykun k’aspipi warkuspa wañuchiranku. Jehová Diosmi ichaqa Jesusta kachamuran qespichiwananchispaq. Payta qhawaspa kasukusun chayqa, wiñay kawsaytan chaskisun. Chaymantaña kaymantaqa astawan yachasun.