¿RIKUSHANKICHU kaypi sucedesqanta? Kay runakunaqa Israelmanta soldadokunan. K’umuspan unuta ukyashanku. Gedeón sutiyoq Juezmi qayllankupi sayashan imayna ukyasqankuta qhawaspa.

Qhawariy imaymananmanta unu ukyasqankuta. Wakinmi unukama k’umuykunku. Hukninmi ichaqa makinwan unuta ukyashan muyuriqninta qhawapakuspa. Kay ruwasqanqa allinmi, Jehová Diosmi Jedeonta nin qhawakachakuspa unu ukyaqtan akllanki, nispa. Wakinqa wasinkutan kutipunanku. ¿Ima rayku? Chaymanta kunan yachasun.

Manan israelitakunaqa Jehová Diosta kasukunkuchu chaymi hukmanta ñak’arishanku. Madianpi tiyaq runakunan paykunamanta aswan atiyniyoq kaspa israelitakunata ñak’arichinku. Chaymi paykunaqa Jehová Diosta mañakunku yanapananpaq, paytaq uyarin mañakusqankuta.

Gedeontan Jehová Dios nin soldadokunata maskhananpaq, chaymi Gedeonqa huñun 32.000 soldadokunata. Israelwan maqanakuqkunaqa 135.000 soldadokunan. Jehová Diosmi Gedeonta nin: ‘Sinchi askhan runaykikunaqa,’ nispa. ¿Ima raykun chayta nin?

Maqanakuypi atipaspan israelitakunaqa ninkuman ñoqallayku atiparayku, manan Jehová Diospa yanapayninwanchu, nispa. Chay raykun Jehová Dios Gedeonta nin: ‘Manchalikunata niy wasinkuman kutipunanpaq,’ nispa. Chayta niqtinmi 22.000 soldadokuna wasinkuman ripunku. Chaymi Gedeonqa qhepakun 10.000 runakunallawanña 135.000 soldadokunawan maqanakunankupaq.

Jehová Diosmi ichaqa hukmanta nillantaq: ‘Askharaqmi runaykikuna,’ nispa. Chaymi Gedeonta kamachin runankunata mayuman pusaspa unuta ukyachinanpaq, chaypi ukyasqankuta qhawaspa unukama k’umuqkunata wasinkuman kutichipunanpaq. Jehová Dios prometen: ‘Unuta ukyaspa qhawakachakuq 300 runakunallawanmi maqanakuypi atipanki,’ nispa.

Maqanakunanku p’unchaymi Gedeonqa kinsapi t’aqan 300 runankunata. Sapanka runamanmi qon huk waqrata, antorchayoq jarratawan. Kuska tutata hinan, llapanku huñukunku awqankuq karpakusqanku muyuriqninpi. Huk nisqallan waqrankuta llapanku phukunku, antorchayoq jarrankuta p’akispataq qaparinku: ‘¡Jehová Diospa espadan Gedeonpa espadanpiwan!’ nispa. Rikch’arispan awqankunaqa sinchita mancharikunku manan ima ruwaytapas atinkuchu. Llapankun ayqekunku chaymi israelitakuna atipanku.