MOISESQA israelitakunawan kuskan Canaanman haykuyta munan. Chaymi nin: ‘Jehová Dios ama hina kaspa, chinpasaq Jordán mayuta sumaq allpata rikunaypaq,’ nispa. Jehová Diostaq nin: ‘¡Chaykamalla! ¡Amaña chaymanta rimapayawaychu!’ nispa. ¿Ima raykun chhaynata nin Jehová Dios?

Qaqata p’anaspa Jehová Diosta qonqasqanmantan. Yuyashankichu: manan Moisespas Aaronpas Jehová Diosta hatuncharankuchu. Manan llaqtata nirankuchu Jehová Diosmi kay unuta qosunkichis, nispa. Chay raykun Jehová Diosqa paykunata niran, manan Canaanman haykunkichischu, nispa.

Aaronpa wañusqan qhepallamanmi, Jehová Diosqa Moisesta nin: ‘Josueta churay sacerdote Eliazarpa ñawpaqenpi, llaqtaq ñawpaqenpiwan. Llapankuq ñawpaqenpi niy, Josué mosoq umalliqniykichis kanqa,’ nispa. Jehová Diospa nisqanta hinapunin Moisesqa ruwan, dibujopi rikusqayki hina.

Chaymi Jehová Diosqa Josueta nin: ‘Qaqata sayay, ama manchakuychu. Israelitakunatan pusanki prometesqay Canaán allpaman, ñoqan yanapasayki,’ nispa.

Chaymantan Jehová Dios Moisesta nin Moabpi Nebo orqoman wichananpaq. Chay orqomantan Moisés qhawan Jordán mayu chinpata, rikuntaq Canaán sumaq allpata. Jehová Diosmi nin: ‘Kay allpatan prometerani Abrahanpa, Isaacpa, Jacobpa churinkunaman. Kaymanta qhawariy, manan ichaqa chayman haykunkichu,’ nispa.

Nebo orqo patapin Moisesqa wañuran 120 watanpi. Allin kallpayoqraqmi karan, ñawinpas allintaraqmi rikuran. Anchatan israelitakunaqa Moisesmanta llakikunku, sinchitan waqankupas. Kusikunkun ichaqa Josué umallinku kasqanwan.