¿IMATAN kay runakuna pampamanta hoqarishanku? Rit’i hinan. Yuraq, llaphsa ñut’u raphikuna hina. Manan ichaqa rit’ichu, kayqa mikhunan.

Israelitakuna Egipto suyumanta lloqsimusqankuqa huk killa hinallaraqmi. Ch’inneq aqo pampapin kashanku. Chaypiqa pisitan imapas wiñan, chaymi paykunaqa rimapakunku: ‘Egipto suyupi aswanpas Jehová Diosqa wañuchiwasunman karan. Chaypiqa ima munasqanchistan mikhuranchis,’ nispa.

Chaymi Jehová Dios nin: ‘Hanaq pachamanta mikhunata parachimusaq,’ nispa. Chaytan ruwan. Paqaristinmi pampapi yuraqllataña rikuspa israelitakuna tapukuranku: ‘¿Imataq kayri?,’ nispa.

Moisesmi nin: ‘Kayqa Jehová Diospa qosqasuykichis mikhunan,’ nispa. MANÁ nispan runakuna sutichanku. Maná nisqa mikhunaqa mielniyoq llaphsa t’antakuna hinan.

‘Mikhunaykichispaq hinalla sapankaykichis hoqariychis,’ ninmi Moisés runakunata. Chaymi sapa tutamanta chayta ruwanku. Inti q’oñirimuqtinmi pampapi puchuq maná nisqa mikhuna chullupun.

Moisesqa nillantaqmi: ‘Ama pipas maná nisqa mikhunata paqarinpaq waqaychanqachu,’ nispa. Wakinmi ichaqa waqaychanku. ¿Iman suceden? ¡Paqaristinpaqmi waqaychasqanku maná nisqa mikhunaqa kuruspa asnaripuran!

Jehová Diosmi paykunata nin semanapi huk p’unchaylla iskay p’unchaypaq hoqarinankuta. Soqta kaq p’unchaypin chayta ruwanku. Jehová Diosmi niran paqaristinpaq waqaychanankuta, chay qanchis kaq p’unchaypiqa manan mikhunata parachimunanchu karan. ¡Qanchis kaq p’unchaypaq waqaychasqankuqa manan kururanchu nitaq asnaranpaschu! ¡Milagron kayqa!

Ch’inneq aqo pampapi kashaspan israelitakunaqa tukuy tiempopi maná nisqata mikhuranku.