BIBLIAPIN tarinki Rut sutiyoq librota. Chaypi willan huk familiamanta, Israelpi juezkunaq kamachisqan tiempopi. Rutqa manan Diospa llaqtanmantachu, Moab llaqtamanta sipasmi. Jehová Diosta reqsispan Rutqa anchata payta munakun. Noemiqa yuyaqñan, paymi Rutta yanaparan Jehová Diosta reqsinanpaq.

Noemiqa israelitan. Israelpi mikhuna pisiyaqtinmi paypas qosanpas iskay wawakunantin Moab llaqtaman astakuranku. Chaypin Noemiq qosan wañupuran. Chaymantan Noemipa wawankuna casarakuran Moab llaqtayoq warmikunawan, hukninmi Rut, huknintaq Orpa. 10 wata qhepata hinan Noemiq iskaynin wawankuna wañuran. ¡Llakikunapaqmi karan! ¿Imatan Noemi ruwaran?

Noemiqa llaqtanta kutipuyta munan. Rutpas Orpapas Noemiwan kuska tiyayta munaspanku paywan rinku. Karupiña kashaqtinkun Noemiqa iskaynin sipaskunata nin: ‘Kutipuychis llaqtaykichista, mamaykichiswan kuska tiyamunaykichispaq,’ nispa.

Qhachuninkunata much’aykuspan Noemiqa ripunanpaq allichakun. Chaymi paykunaqa waqayta qallarinku Noemita anchata munakusqanku rayku. Ninkun: ‘¡Manan kutisaqkuchu! Qanwanmi llaqtaykita risaqku,’ nispa. Noemí ichaqa nin: ‘Wawaykuna, kutipuychis. Llaqtamasiykichiswanmi aswan allinqa kankichis,’ nispa. Chaymi Orpaqa llaqtanman kutiripun. Rutmi ichaqa mana ripunchu.

Payman kutirispan Noemiqa nin: ‘Orpaqa ripunñan. Paywan kuska ripuy,’ nispa. Rutmi ichaqa kutichin: ‘¡Ama hark’awaychu qanwan rinayta! Maytachus rinki chaytan ñoqapas risaq, maypichus tiyanki chaypin ñoqapas tiyasaq. Llaqtaykin llaqtay kanqa, Diosniykin Diosniy kanqa. Maypichus wañunki, chaypin wañusaq, chaypin p’anpawanqakupas,’ nispa. Kayta uyarispan Noemiqa upallapun.

Iskaynin warmikunan Israelman chayanku. Chaypin tiyanku. Cebada cosechana tiempo kaqtinmi Rutqa llank’ayta qallarin. Booz sutiyoq runa hinallata qhawaran chakranpi Rutpa cebada pallakunanta. ¿Yachankichu pin karan Boozpa maman? Jericó llaqtayoq Rahabmi.

Huk p’unchaymi Boozqa Rutta nin: ‘Qanmantan rimaqta uyarini, Noemiwanpas sumaq sonqo kasqaykita. Yachanin tayta-mamaykitapas nacesqayki llaqtatapas saqespa mana reqsisqayki llaqtaman hamusqaykita. ¡Jehová Diosmi chay ruwasqaykimanta kutichipusunki!,’ nispa.

Rutmi kutichin: ‘Wiraqocháy, sumaqtan qhawariykuwanki. Sonqoytan kusirichinki sumaqta rimapayawaspayki,’ nispa. Boozqa anchatan Rutta munakun, chaymi pisi tiempomanta casarakunku. ¡Anchatan chaywan Noemí kusikun! Rutpa, Boozpa phiwi wawanku Obed naceqtinmi Noemiqa astawanraq kusikun. Obedqa Davidpa abuelonmi karan; chaymantaña Davidmantaqa astawan yachasun.