KAY Allpapiqa karanmi llapa runakunamanta sinchi kallpasapa runa, ¿yachankichu sutinta? Sansonmi, payqa juezmi karan. Jehová Diosmi Sansonmanqa kallpata qoran. Manaraq naceshaqtinmi, Jehová Dios niran Sansonpa mamanta: ‘Wawayoqmi kanki. Paymi filisteokunaq makinmanta israelitakunata qespichinqa,’ nispa.

Filisteokunaqa Canaanpi tiyaq millay runakunan. Askha soldadokunayoq kaspan israelitakunata ñak’arichinku. Huk kutinmi filisteokunaq tiyasqanta Sansón rishaqtin phiña leonwan tupan. Sansonmi ichaqa makillanwan leonta wañuchin. Millay filisteokunatapas pachakninpin wañuchin.

Chay qhepamanmi Sansonqa Dalila sutiyoq warmita munapayan. Filisteamanta umalliqkuna Dalilata ninku, sichus willawankiku Sansonpa kallpan imapi kasqanta chayqa, sapankaykun qosaykiku 1.100 qolqeta, nispa. Dalilaqa qolqetan munan. Manan Sansonta nitaq Diospa llaqtanta munakunchu. Chaymi Dalilaqa Sansonta tapupayan imapi kallpan kasqanta.

Tapupayaspan, Dalilaqa willachikunpuni Sansonpa kallpan imapi kasqanta. ‘Manan hayk’aqpas chukchaytaqa rutuwarankuchu. Nacesqaymantapachan Diosqa akllawaran paypa kamachin nazareo kanaypaq. Chukchayta rutuwaqtinkuqa kallpaymi pisiyapunman,’ nispa willan.

Kayta uyarispan Dalilaqa moqon patapi Sansonta puñuchin. Chaymi huk runawan Sansonpa chukchanta rutuchin. Rikch’arispan Sansonqa reparakun mana kallpayoq kasqanta. Chaymi filisteokunaqa haykuspa Sansonta hap’inku. Iskaynin ñawinta horqospataq paykunaq kamachinman tukuchinku.

Huk p’unchaymi filisteokuna hatun fiestata ruwanku diosninku Dagonta yupaychanankupaq, chaymi Sansonta carcelmanta horqomunku paymanta asikunankupaq. Carcelpi kashaqtinmi Sansonpa chukchanqa wiñan. Makinmanta pusaq waynachatan Sansón nin: ‘Wasi hap’iq columnakunata hap’iykachiway,’ nispa. Chaymi Sansonqa Jehová Diosmanta kallpata mañakun, columnakunata hap’ispataq qaparin: ‘Filisteokunawan kuska wañusaq’ nispa. 3.000 filisteokunan chay fiestapi kasharanku, wasipi columnakunata tanqarpariqtinmi wasiqa thuniykuran, llapan millay runakunataq wañuran.