¿IMAPAQMI kay karpa? Jehová Diosta yupaychanapaqmi. Sutinqa yupaychana karpa. Egiptomanta lloqsimusqanku qhepatan huk watallapi ruwaranku. ¿Pin kay karpata ruwanankupaq kamachiran?

Jehová Diosmi. Sinaí orqo patapi Moisés kashaqtinmi Jehová Diosqa niran imayna ruwananta. Paskanapaq hinalla ruwanki, niranmi. Chaymi wantunalla karan, maypipas yapamanta sayarichinapaq. Chay raykun ch’inneq pampapi maymanpas israelitakuna astakuspaqa yupaychana karpata apaqku.

Yupaychana karpaq huch’uy cuartochanpin kashan huk caja. Chay cajata suticharanku, rimanakuy arca, nispa. Qorimanta ruwasqa iskay angelkunayoqmi, sapanka ladopitaq huk karan. Diosqa hukmantan qelqaran iskay p’alta rumikunapi Chunka Kamachikuykunata, ñawpaq qelqakunata Moisespa p’akisqan rayku. Chay rumikunatan rimanakuy arcapi waqaycharanku. Chaypin waqaychallarankutaq jarrapi maná nisqa mikhunata. ¿Yuyarinkichu iman maná nisqa?

Jehová Diosmi akllan Moisespa wayqen Aaronta uma sacerdote kananpaq. Paymi llaqtata umallin Jehová Diosta yupaychaypi. Churinkunapas sacerdoten kanku.

Qhawariy yupaychana karpapi hatun cuartota. Huch’uy cuartochamanta aswan hatunmi. ¿Rikushankichu cajachamanta q’osñiq lloqsisqanta? Chay altarpin sacerdotekuna inciensota q’osñichinku, chayqa sumaqtan q’apan. Qhawarillaytaq qanchis lamparayoq candelabrotapas. Cuartopiqa kallantaqmi mesapas chaypin kashan 12 t’antakuna.

Yupaychana karpa patiopin kashan hatun p’uku hunt’a unuyoq. Chaypin sacerdotekuna mayllikunku. Kallantaqmi hatun altarpas. Kaypin ruphachinku wañusqa animalkunata Jehová Diosman ofrendata haywanankupaq. Yupaychana karpaqa campamentoq chawpinpin kashan, israelitakunataq muyuriqninpi tiyanku.