KAYQA sumaq paraison, chhaynatapaschá Diosqa rikuchiran profetan Isaiasman. Jonaspa wañusqan qhepallamanmi Isaiasqa kawsaran.

Paraisoqa “huerta” otaq “parque” ninantan nin. ¿Imatan yuyarichisunki kaypi rikusqayki? Arí, Adanpaq Evapaq Diospa ruwasqan sumaq huertata, ¿riki? ¿Allpantinchu kay huerta hina kanqa?

Jehová Diosmi profetan Isaiaswan qelqachiran llaqtanpaq hamuq tiempopi paraíso kananmanta. Niranmi: ‘Lobokunan ovejakunawan kuska sumaqta kawsanqa. Uña wakapas uña leonwan kuskan mikhunqaku, wawakunan paykunata michinqa. Venenoyoq mach’aqwaypas manan qayllanpi pukllaq wawata imananqapaschu,’ nispa.

‘Manan hayk’aqpas chayqa kanmanchu,’ ninkupaschá wakinqa. ‘Karanpunin Allpapi ñak’ariykunaqa, manataqmi hayk’aqpas tukunmanchu,’ nispa. Kayta ichaqa yuyariy, ¿imaynan karan Adanman Evamanpas Diospa qosqan allpa?

Diosqa paraisopin churaran Adanta Evatapas. Mana kasukusqanku raykun paykunaqa chay huertamanta qarqochikuranku, chaymantataq machuyaspa wañuranku. Paykunaq chinkachisqan sumaq huertatan Diosqa qonqa munakuqninkunaman.

Hamuq tiempopi mosoq paraisopiqa manan pitapas imapas imananqachu. Thak kawsaymi kanqa. Llapa runan kusisqa kawsanqa mana onqospa, qallariypi Diospa munasqan hina. Chaymantaña yachasun chaykunata Diospa imayna ruwananta.