JEROBOÁN wañusqan qhepamanmi Israelpi 10 ayllukunapi kamachiqkunaqa millaykama karanku. Llapankumanta aswan millayqa Ahabmi. ¿Ima rayku? Warminmi chaypaq huchayoq, chay warmiqa millay kamachikuq Jezabelmi.

Jezabelqa manan Israelmantachu. Sidonpi kamachiqpa ususinmi. Pantasqa dios Baaltan yupaychan; qosan Ahabtapas, askha israelitakunatapas tanqan chayta yupaychanankupaq. Jezabelqa cheqnikunmi Jehová Diosta, chay raykun wañuchin askha profetankunata. Wañuyta mana munaspan wakinqa orqo t’oqokunapi pakakunku. Jezabelqa wañuchinmanmi pitapas munasqanta ruwananpaq.

Huk p’unchaymi kamachikuq Ahab llakisqa kasharan. Jezabelmi tapun: ‘¿Ima raykun llakisqa kashanki?’ nispa.

Ahab kutichin: ‘Nabotpa niwasqanwanmi, uvas chakrantan rantiyta munarani. Manan vendewayta munanchu,’ nispa.

‘Ama llakikuychu, ñoqan chay allpata qosayki,’ ninmi Jezabelqa.

Chaymi Jezabelqa Nabotpa tiyasqan llaqtapi umalliq runakunaman cartata apachin. ‘Mana imapaq valeq runakuna nichun Nabotmi ñakan Diosta, kamachikuqtawan. Chaymantataq llaqtamanta horqospa rumiwan ch’aqespa wañuchinkichis,’ nispa.

Nabotpa wañusqanta yachaspan Jezabelqa Ahabta nin: ‘Qanpañan uvas chakraqa,’ nispa. ¿Muchuchinankuchu Jezabelta chay mana allin ruwasqanmanta?

Arí, chay raykun Jehová Diosqa qhepaman Jehuta kamachin Jezabelta muchuchinanpaq. Jehú hamunanta uyarispan Jezabelqa ñawinta pintakuspa sumaqta allichakusqa. Wasinman chayamuspan Jehuqa ventanapi Jezabelta rikuspa, palaciopi runakunata kamachin: ‘¡Wikch’uyamuychis!,’ nispa. Jehuta kasukuspan chay runakunaqa ventanamanta tanqayunku, kay dibujopi rikusqayki hina. Pampaman chayaspan wañun. Chhaynapin wañun millay kamachikuq Jezabelqa.