QHAWARIY unu ukhupi runata. Manchasqan kashan, ¿riki? ¡Kay challwan millp’unqa! ¿Pitaq chay runari? Jonasmi. ¿Imaynapin kay runa chhaynapi tarikuran? Kunanmi chaymanta yachasun.

Jonasqa Jehová Diospa profetanmi. Profeta Eliseoq wañusqan pisi tiempo qhepallamanmi Jonasta Jehová Dios kamachin: ‘Nínive llaqtata riy. Chay llaqtapi runakunaqa nishutan huchallikunku, chay ruwasqankuta reparachimuy,’ nispa.

Jonasqa manan munanchu riyta. Chaymi Nínive llaqtamanta ayqekuspa huk llaqtaman apaq barcoman seqan. Jehová Diosqa manan munanchu Jonaspa ayqekunanta. Nishuta parachin sinchi wayrantinta. Barcopas lamar-qochamanmi chinkayunqaña. Barcopi kaqkunan sinchita mancharikunku, diosninkutataqmi wakyakunku yanapananpaq.

Jonasmi paykunata nin: ‘Ñoqaqa Jehová Diostan yupaychani, hanaq pachatapas kay pachatapas kamaq Diosta. Jehová Diospa kamachiwasqanmantan ayqekushani,’ nispa. Barcopi kaqkunan tapunku: ‘¿Imanasaykikun parapas wayrapas sayananpaq?,’ nispa.

‘Lamar-qochaman wikch’uykuwaychis, chayraqmi parapas wayrapas sayanqa,’ ninmi Jonás. Barcopi kaqkunaqa manan munankuchu chay ruwayta, parapas wayrapas astawan yapaqtin, lamar-qochapas astawan aytikachakuqtinmi ichaqa, Jonasta lamar-qochaman wikch’uyunku. Wikch’uyuqtinku hinan wayrapas parapas lamar-qochapas sayan.

Unu ukhuman Jonás urmaykuqtinmi, hatunkaray challwa millp’uykuran. Manan ichaqa wañunchu. Kinsa p’unchay kinsa tutan challwaq wiksanpi kashan. Chayraqmi Jonasqa pesapakun Jehová Diosta mana kasukuspa Nínive llaqtata mana risqanmanta. ¿Imatan ruwan?

Jehová Diosta mañakun yanapananpaq. Chaymi Jehová Diosqa hatunkaray challwata kamachin Jonasta ch’aki pampaman aqtunanpaq. Chaymantan Jonasqa rin Nínive llaqtata. ¿Manachu kay yachachiwanchis Jehová Diostaqa imaymanapi kasukunata?