¿PIKUNAN kay runakuna? ¿Imatan ruwashanku? Maqanakuymanmi rishanku, ñawpaqta riqkunataq takishanku. Tapukunkipaschá: ‘¿Ima raykun takiqkuna mana apankuchu espadatapas lanzatapas?,’ nispa. Chaymantan kunan yachasun.

Josafatqa Israelpi kamachiqmi, iskay ayllukunatan kamachin. Wichay ladopi 10 ayllukunata Ahabpas Jezabelpas kamachisqanku tiempopin payqa kawsaran. Josafatqa allin kamachikuqmi, taytan Asapas allin runan karan. Chay raykun uray ladopi iskay ayllukunaqa unay tiempo sumaqta kawsaranku.

Kunanmi ichaqa manchasqa kashanku. Huk runakunan Josafatman willanku: ‘Monte Seirmanta, Amonmanta, Moabmantawanmi askha soldadokuna hamushanku qanwan maqanakunankupaq,’ nispa. Chaymi askha israelitakuna Jerusalenpi huñukunku Jehová Dios yanapananta suyakuspa. Yupaychana wasita rispan chaypi Josafatqa Jehová Diosmanta mañakun: ‘Jehová Diosniyku, manan ima ruwaytapas atiykuchu. Manan atiykumanchu kay hatun ejército atipayta. Qan yanapawayku,’ nispa.

Jehová Diosqa uyarinmi mañakusqankuta, chaymi huk kamachinwan llaqtaman willachin: ‘Manan qankunachu maqanakunkichis, Diospa maqanakuyninmi. Qhawallankichismi Jehová Diospa qespichisqanta,’ nispa.

Paqaristinmi Josafatqa llaqtata nin: ‘¡Jehová Diosmanta hap’ipakuychis!’ nispa. Chaymantan soldadokunaq ñawpaqenpi churan takiqkunata, paykunan purispa Jehová Diosta hatunchanku takikunawan. ¿Iman suceden maqanakuyman asuykuqtinku? Paykuna puratan awqankunata Jehová Dios maqanachin. ¡Israelitakuna chayaqtintaq soldadokunaqa llapanku wañusqa kasqaku!

Josafatqa yachayniyoq kaspan Jehová Diospi hap’ipakuran. Chayta ruwaspan ñoqanchispas yachayniyoq kasun.