PUSAQ watallanpin Josiasqa Israelpi iskay ayllukunata kamachiran. Wawallaraqmi kamachiq kananpaqqa. Chay raykun qallariypiqa kuraq runakuna yanapanku.

Qanchis watata Josías kamachishaqtinmi Jehová Diosta maskhayta qallarin. Ñawpa tiempopi David, Josafat, Ezequías allin kamachikuqkunaq ruwasqantan paypas ruwan. Waynachallaraq kashaspan allinkunata ruwan mana manchakuspa.

Yaqa llapan israelitakunan millay kanku. Pantasqa dioskunatan yupaychanku. Idolokunamanmi qonqorikunku. Chaymi Josiasqa runakunantin iskaynin ayllukunapi ch’usaqyachin pantasqa dioskunata. Kayqa sasa ruwaymi, askha runakunan pantasqa dioskunata yupaychanku. Qhawariy Josiasta runankunawan kuska idolokunata ñut’ushanku.

Chay qhepamanmi Josías kamachin kinsa runakunata Jehová Diospa yupaychana wasinta allichanankupaq. Llaqtamanta qolqeta huñuspan kay runakunaman qon llank’aqkunaman paganankupaq. Yupaychana wasipi llank’ashaqtinkun uma sacerdote Hilcías tariran, Moiseswan qelqachisqan Jehová Diospa kamachikuyninkunata. Unay tiempoñan kay qelqakunaqa chinkaran.

Josiasman qelqata apaqtinkun, payqa leechikun. Leesqankuta uyarispan Josiasqa reparan Jehová Diospa kamachisqanta runakunaq mana kasukusqanta. Sinchita llakikuspan p’achanta llik’in, kaypi rikusqayki hina. Chaymantan nin: ‘Jehová Diosmi ñoqanchiswan phiñasqa kashan, kay qelqapi kamachikuykunata tayta-mamanchiskunaq mana kasukusqanwan,’ nispa.

Chaymi Josiasqa uma sacerdote Hilciasta kachan, huchankumanta iman sucedenqa, chayta yachamunanpaq. Hilciasqa profetisa Huldata tapun. Paymi Jehová Dios nisqanta Josiasman willachin: ‘Jerusalenmi llapa runakunantin muchuchisqa kanqa, pantasqa dioskuna yupaychasqankumanta, allpatapas millay kawsaywan hunt’achisqankumanta. Josías, qanqa allintan imatapas ruwanki, chay rayku kay muchuchiyqa sucedenqa wañusqayki qhepataña,’ nispa.