KAMACHIKUQ Nabucodonosormi Babiloniaman apan allin yachayniyoq israelitakunata. Paykunamantan akllan sumaq rikch’ayniyoq, allin yachayniyoq waynakunata. Rikushankichu kaypi tawa waynakunata. Hukninmi Daniel, kinsantin waynakunatataqmi Babiloniapi runakuna sutichanku Sadrac, Mesac, Abednego, nispa.

Nabucodonosormi wasinpi kamachinkuna kananpaq yachachiyta munan. Kinsa watata yachachispan akllanqa allin yachayniyoq waynakunallata, sasachakuykuna allichayta yanapanankupaq. Payqa munan waynakuna kallpasapa kanankuta, chaymi kamachin paypa mikhusqan mikhunata mikhunankupaq, ukyasqan vinotapas ukyanankupaq.

Qhawariy Danielta. ¿Imanishanmi Nabucodonosorpa mayordomon Aspenazta? Manan munanichu kamachiqpa mikhunan mikhuyta, nishanmi. Aspenazmi ichaqa chaywan llakikun. ‘Kamachiqmi kamachin ima mikhunaykichista ima ukyanaykichistapas. Sichus mana huk waynakuna hina allin qhalichu kankichis chayqa, kamachiqmi wañuchiwanman,’ nispan nishan.

Chay raykun Danielqa riman paykuna cuidananpaq Aspenazpa churasqan guardiawan. ‘Chunka p’unchayta probawayku. Mana aychayoq mikhunata qowayku mikhunaykupaq, unutataq ukyanaykupaq. Chaymanta qhawariwayku mayqenniyku allin kasqaykuta, kamachiqpa mikhunan mikhuq waynakunachu icha ñoqaykuchu,’ nispa.

Guardiaqa chaytan ruwan. 10 p’unchay qhepatan, Danielpas kinsantin amigonkunapas, kamachiqpa mikhunanta mikhuq waynakunamanta aswan allin rikch’ayniyoq kanku, chaymi mana aychayoq mikhunallata mikhuchinku.

Kinsa wata hunt’akuqtinmi kamachiq Nabucodonosorman pusanku llapan waynakunata. Paykunawan rimaspan kamachiqqa reparan Danielpas kinsantin amigonkunapas huk waynakunamanta aswan yachayniyoq kasqankuta. Chaymi qhepachin palacionpi yanapanankupaq. Kamachikuqpa tapusqankunata, sasachakuykuna willasqantapas kutichiqtinkun, reparanku Danielpas, Sadracpas, Mesacpas, Abednegopas, sacerdotekunamanta yachayniyoq runakunamantapas, chunka kuti aswan yachayniyoq kasqankuta.