WAYNALLARAQMI Salomonqa kamachiq karan. Jehová Diostan munakun, kasukunmi taytan Davidpa qosqan allin yachachiykunatapas. Jehová Diosqa kusikunmi Salomonwan, chaymi huk tuta mosqoyninpi nin: ‘Salomón, ¿imatan qonayta munanki?’ nispa.

Salomonmi kutichin: ‘Jehová Diosniy, waynallaraqmi kani, manan yachanichu imayna kamachiyta. Chay rayku yachayta qoway llaqtaykita allinta kamachinaypaq,’ nispa.

Jehová Diosqa kusikunmi Salomonpa mañakusqanwan. Chay rayku nin: ‘Qanqa manan unay kawsaytachu mañakunki nitaq qhapaq kaytapaschu, aswanmi yachayta mañakunki, chay rayku ancha yachayniyoq kanki, ñawpaq kawsaq runakunaqa manan pipas qan hina yachayniyoq karanchu. Qollasaykitaqmi mana mañakusqaykitapas, qhapaq kayta, allin resisqa kaytapas,’ nispa.

Pisi tiempo qhepallamanmi iskay warmikuna Salomonman hamuranku sasachakuyninkuta willanankupaq. Hukninmi nin: ‘Kay warmiwanmi kaq wasillapi tiyayku. Ñoqan wawayta wachakurani, iskay p’unchay qhepamantaq paypas wawanta wachakullarantaq. Huk tutan paypa wawan wañun. Puñushanaykaman wañusqa wawanta qayllayman churaspa ñoqaq wawayta aparikusqa. Puñusqaymanta rikch’arispay wañusqa wawata rikuspa, repararani huk wawa kasqanta.’

Chayta uyarispan hukkaq warmiqa nin: ‘¡Manan! ¡Kawsaq wawan ñoqaq, wañusqataq paypa!’ Ñawpaq kaq warmin kutichin: ‘¡Manan! Wañusqa wawan qanpa, kawsaqtaqmi ñoqaq!’ nispa. Chhaynatan kay warmikuna atipanakunku. ¿Imatan ruwan Salomón?

Espadata apachimuspan nin: ‘Iskayman kuchuychis kawsaq wawata, hinaspa kuskanninka sapanka warmiman qoychis,’ nispa.

‘¡Ama! Amapuni wawataqa wañuchiychischu ¡Payman qopuychis!,’ nispan qaparin cheqaq maman. Huknin warmin ichaqa nin: ‘Ama mayqenniykumanpas qowaykuchu; iskayman kuchuychis,’ nispa.

Chaymi Salomonqa nin: ‘¡Ama wawata wañuchiychischu! Qopuychis ñawpaq kaq warmiman. Paymi cheqaq maman,’ nispa. Cheqaq mamaqa anchatan wawanta munakun, chaymi huk kaq warmiman qopuyta munan, wawanta mana wañuchinankupaq, chhaynapin Salomonqa yachan pin wawaq maman kasqanta. Chay sasachakuyta Salomón imayna allichasqanta uyarispan runakunaqa kusikunku kamachiqninku yachayniyoq kasqanmanta.

Salomonpa kamachisqan tiempopin Diosqa llaqtanta saminchan, chaymi chakrankupas askhata rurun, trigota, cebadata, uvasta, higokunata, huk mikhuykunatapas. Runakunapas allin p’achasqa, sumaq wasiyoqmi kanku. Llapankun imaymanayoq kanku.