MANARAQ wañushaspan Davidqa Salomonman qoran Diospa qosqan planokunata Jehová Diospaq yupaychana wasita ruwananpaq. Tawa watata kamachishaspan Salomonqa yupaychana wasita ruwayta qallarin, qanchis wata kuskanpitaq tukuran. Chunka waranqanpi runakunan chay yupaychana wasita ruwaranku, sinchi chaniyoqmi, askha qoriwan qolqewan ruwasqa kasqan rayku.

Kay yupaychana wasiqa yupaychana karpa hina iskay cuartoyoqmi. Chay cuartokunaq sayayninmi ichaqa yupaychana karpa cuartokunamanta iskay kuti hina. Ukhu cuartopin Salomonqa churachin rimanakuy arcata; yupaychana karpapi wakin kaqkunatataq huknin cuartopi.

Yupaychana wasita ruwayta tukuspan, hatun fiestata ruwanku. Kaypi rikusqayki hinan, yupaychana wasiq ñawpaqenpi qonqorikuspa Salomonqa Diosmanta mañakun. ‘Manan hanaq pachantinpas aypanmanchu tiyanaykipaq, chay rayku, ¿imaynatan kay yupaychana wasi ruwasqay aypasunkiman? Diosnilláy, kay yupaychana wasita qhawaspa llaqtayki mañakamuqtinqa, uyariykuy ama hina kaspa.’

Salomón mañakuyta tukuqtinmi, hanaq pachamanta Diosqa ninata kachaykamun. Sacrificiopaq churasqan animalkunatan ruphan. Jehová Diospa lliplli k’anchaynintaq yupaychana wasita hunt’aykun. Kaywanmi Jehová Dios rikuchin, yupaychana wasimanta, Salomonpa mañakusqanmantapas kusikusqanta. Kunanqa yupaychana wasipin runakuna Jehová Diosta yupaychashanku manaña yupaychana karpapiñachu.

Unay tiempon Salomonqa yachaywan kamachin, runakunapas kusisqan kashanku. Huk dioskuna yupaychaq warmikunawanmi ichaqa casarakun. ¿Rikushankichu kaypi ídolo yupaychaq warmita? Chay warmikunan Salomonta tanqan huk dioskunata yupaychananpaq. ¿Iman chaymanta suceden? Millaymanmi Salomonqa tukun, llaqtapas manañan sumaqtachu kawsan.

Chaywanmi Jehová Diosqa Salomonpaq phiñakun, kayta nin: ‘Kamachikuytan qechusayki huk runaman qonaypaq. Wañusqayki qhepaman churiyki kamachishaqtinmi chaytaqa ruwasaq. Ichaqa manan suyuntintachu churiykimanta qechusaq,’ nispa. Yachasun kaykuna imayna sucedesqanta.