YAQA iskay watañan pasan medokuna persakunawan Babilonia llaqtata atipasqankumanta. ¡Qhawariy kayta! Arí, israelitakunan Babiloniamanta lloqsimushanku. ¿Ima raykun kacharichisqa kashanku? ¿Pin kacharichiran?

Persia suyupi kamachiq Ciron kaytaqa ruwan. Unay tiempo ñawpaqtan manaraq Ciro naceqtin, Jehová Diosqa profeta Isaiaswan qelqachiran Ciromanta: ‘Ñoqaq munasqaytan ruwanki. Llaqtaq punkunkunatan kichasqata saqenqaku chayninta haykuspan atipanki,’ nispa. Arí, Ciro umalliran Babiloniata atipanankupaq. Punkukunatan kichasqata saqesqaku, chaynintan haykuranku medokuna persakunawan Babilonia llaqtata hap’inankupaq.

Jehová Diospa profetan Isaiasmi willaranña Jerusalentapas, yupaychana wasitapas hukmanta sayarichinankupaq Ciroq kamachinanta. ¿Kamachiranchu Ciro kay ruwanankupaq? Arí. Israelitakunatan niran: ‘Jerusalenta riychis, Jehová Diosniykichispa yupaychana wasinta ruwamuychis,’ nispa. Chaytan israelitakunaqa ruwanqaku.

Manan Babiloniapi tiyaq llapan israelitakunachu Jerusalentaqa kutinku. Yaqa 800 kilometrota hinan purina, chay raykun askha israelitakuna mana kutinkuchu, wakinmi onqosqa kanku, wakintaq machu-payaña. Karanmi huk razonkunapas mana kutinankupaq. Mana kutiy atiqkunatan Ciro nin: ‘Qoychis qolqeta qorita huk regalokunatapas Jerusalenta kutispa yupaychana wasitapas llaqtatapas hukmanta sayarichinankupaq,’ nispa.

Chaymi Jerusalenman kutiq israelitakunaqa askha regalokunata chaskinku. Ciropas qonmi Jerusalenta thunichispa Nabucodonosorpa apasqan tazonkunata, copakunatapas. Askhatan israelitakunaqa imaymanakunata apanku.

Tawa killata hina viajaspan israelitakunaqa Jerusalenman chayanku. 70 watañan pasan Jerusalenta thunichiqtinku mana runayoq qhepasqanmantaqa. Llaqtankumanña kutinku chaypas, sasa tiempokunapin israelitakunaqa tarikunku, chaymanta yachasun.