¡QHAWARIY kaypi llank’asqankuta! Jerusalén llaqtapaqmi perqata sayarichishanku. 152 wata ñawpaqtan Nabucodonosorqa Jerusalenta ch’usaqyachiran, llaqtaq perqankunata thunichiran, punkunkunatapas ruphachiranmi. Babiloniamanta kutipuspaqa manan israelitakunaqa hatarichisqakuchu Jerusalén llaqtaq perqankunata.

¿Imaynan tiyaranku unay wata mana perqayoq llaqtapi? Manchasqan tiyaranku. Mana sasachu karan awqankuna atipananpaq. Kunanmi ichaqa Nehemías yanapashan Jerusalén llaqtaq muyuriqninta hukmanta perqanankupaq. ¿Pin Nehemías karan?

Nehemiasqa Susa llaqtamanta hamuq israelitan, chaypin tiyanku Mardoqueopas Esterpas. Kamachiqpa palacionpin llank’aran, allin amigontinpaschá karanku Mardoqueowanpas Esterwanpas. Biblia ichaqa nin manan Nehemiasqa Esterpa qosan Asueropaqchu llank’aran. Asueroq kamachikusqan qhepata Artajerjes kamachikuran, paypaqñan Nehemiasqa llank’aran.

Artajerjesqa allin kamachiqmi, paymi Esdrasman qolqeta qoran Jerusalenta kutispa Jehová Diospa yupaychana wasinta allichananpaq. Manan ichaqa Esdraschu llaqtaq urmasqa perqanta hatarichiran. Yachasun Nehemiaspa ima ruwasqanta.

Ñan 13 wataña pasan yupaychana wasita allichananpaq, Artajerjespa Esdrasman qolqe qosqanmanta. Nehemiasqa kamachiqpa copa haywaqninmi. Payqa kamachikuqmanmi haywan vinota, allintan qhawan mana venenoyoq kananpaq. Allin llank’anayoqmi payqa.

Huk p’unchaymi Nehemiasta visitanku wayqen Hanani, huk israelitakunawan. Israelitakunaq sasachakuyninkunatan willanku, Jerusalén llaqtaq perqantapas manaraq hatarichisqankutawan. Nehemiasqa sinchitan llakikun, chaymi Jehová Diosman chaykunamanta mañakun.

Huk p’unchaymi kamachiq Artajerjes reparan Nehemiaspa llakisqa kasqanta, chaymi tapun: ‘¿Imamantan llakisqa kashanki?,’ nispa. Jerusalén llaqta sasachakuypi kasqanmanta, perqankuna urmasqa kasqanmantawan llakisqa kashani, ninmi Nehemías. ‘¿Imapin yanapanayta munanki?,’ nispan tapun kamachiq.

Nehemiasmi nin: ‘Jerusalenta riyta munani perqankunata hatarichimunaypaq,’ nispa. Artajerjesqa sumaq sonqoyoqmi. Rillay Jerusalenta ninmi, yanapantaqmi perqa sayarichinankupaq k’aspikuna maskhaytapas. Jerusalenman chayaspan, llaqtapi runakunaman willan perqa hatarichinanta. Chayta uyarispan paykunaqa kusikunku, chaymi ninku: ‘Qallarisun perqayta,’ nispa.

Israelitakunaq perqasqanta rikuspan awqankunaqa, ninku: ‘Haku wañuchimusun chay runakunata, perqasqankutapas sayachisun,’ nispa. Kayta yachaspan Nehemiasqa llank’aqkunaman qon espadakunata, lanzakunatapas, nintaq: ‘Ama manchakuychischu. Maqanakuychis wawaykichis rayku, wayqe-panaykichis rayku, warmiykichis rayku, wasiykichis rayku,’ nispa.

Manan llaqtapi runakunaqa manchakunkuchu. Tutapas p’unchaypas armantinkaman perqanku. Chay raykun 52 p’unchayllapi perqayta tukunku. Kunanqa manañan manchakunkuchu. Nehemiaswan Esdraswanmi Diospa kamachikuyninta yachachinku, runakunataq chaywan kusisqa kanku.

Manan ichaqa manaraq Babiloniaman rishaspa kawsasqankuta hinaraqchu kawsanku. Persiapi kamachiqmi israelitakunata kamachishan. Jehová Diosmi ichaqa prometeran mosoq kamachiqta kachamunanpaq, paymi llaqtaman thak kawsayta apamunqa. ¿Pin chay kamachiq? ¿Imaynatan thak kawsayta kay Allpaman apamunqa? 450 watan pasan kay kamachiqmanta astawan yachanapaq. Chay qhepatan nacen allin reqsisqa wawa. Chaymantañan chay willakuymantaqa yachasun.