¿IMATAN kaypi ruwashanku? Kay runakunan hatun mikhuypi kashanku. Babiloniapi kamachikuqmi invitan waranqanpi allin reqsisqa runakunata. Jerusalenpi Jehová Diospa yupaychana wasinmanta apamusqanku qorimanta qolqemanta copakunapi, tazonkunapin ukyashanku, mikhushanku ima. Qonqayllamantan runaq makin perqapi qelqayta qallarin. Chayta rikuspan llapanku mancharikunku.

Nabucodonosorpa hawaynin Belsasarmi chay tiempopi kamachikusharan. Paymi qaparispa kamachin yachayniyoq runakunata pusamunankupaq. Ninmi: ‘Perqapi qelqasqata leespa ima nisqanta willawaqniymanmi askha regalokunata qosaq, kamachikuyniypipas kinsa kaq kamachiqmi kanqa,’ nispa. Ichaqa manan mayqen yachayniyoqpas perqapi qelqasqata leeyta atinchu, nitaq ima nisqan willaytapas.

Qaparispa rimasqankuta uyarispan Belsasarpa maman mikhusqankuman haykun. Paymi nin: ‘Ama sinchita manchakuychu. Kamachikusqayki suyupin huk runa kan, payqa reqsinmi ch’uya dioskunata. Abueloyki Nabucodonosormi kamachikuq kashaspa churaran llapan yachayniyoqkunaq umallinta. Danielmi sutin. Payta waqyachimuy, paymi nisunki kaykunaq ima nisqanta,’ nispa.

Chay ratopachan Danielta pusamunku. Manan payqa munanchu regalokuna chaskiyta, chaymantan Belsasarta yuyarichin abuelon Nabucodonosorta kamachikuq kasqanmanta Jehová Diospa wikch’usqanta. Ninmi: ‘Sinchi hatunchakuq kasqanmantan Jehová Diosqa muchuchiran,’ nispa.

Belsasartan nin: ‘Chaykunata yachashaspan qanpas Nabucodonosor hina hatunchakushanki. Jehová Diospa yupaychana wasinpi copakunata, tazonkunata apamuspan chaykunapi ukyashanki. K’aspimanta, rumimanta ruwasqa dioskunatan hatunchashanki, manataq Kamaqninchis Diosta hatunchankichu. Chay raykun Diosqa kay simikunata qelqachin,’ nispa.

Danielmi nin: ‘Kay qelqasqaqa, MENÉ MENÉ, TEKEL, PARSÍN, ninmi.’

‘MENÉ simiqa, kamachinayki p’unchaykunan yupasqaña, ñan tukukunña. TEKEL simiqa, balanzapin pesasunkiku chaymi mana allinta tarisunkiku. PARSÍN simitaq, kamachikuyniykitan qonku medokunaman persakunamanwan,’ nispa.

Daniel rimashallaqtinraqmi medokuna persakunawan Babiloniata haykumunku llaqta hap’inankupaq. Llaqtata haykuspataq Belsasarta wañuchinku. ¡Chay tutapachan hunt’akun perqapi qelqasqa! Kunanri, ¿iman sucedenqa israelitakunata? Chaymantaña chaytaqa yachasun, kunanqa yachasun Danielta ima sucedesqantaraq.