KUNANQA kutirisun Babiloniapi Esdraspa tiyasqan tiempoman. Mardoqueowan Esterwanmi Persia suyupi allin reqsisqa israelitakuna kanku. Esterqa Persiapi kamachikuqpa warminmi, primon Mardoqueotaq iskay kaq kamachikuq hina. Yachasun imaynapi chaykuna sucedesqanta.

Huch’uyllaraq kashaqtinmi Esterpa tayta-maman wañuran, chay raykun primon Mardoqueo paytaqa uywaran. Persiapi kamachikuq Asueroq palacionmi kan Susa llaqtapi, chaypin Mardoqueo llank’an kamachikuqta servispa. Huk p’unchaymi kamachiqpa warmin Vasti, mana kasunchu qosanta, chaymi payqa huk warmita akllan warmin kananpaq. ¿Pitan akllan? Munay warmi Estertan.

¿Rikushankichu kay hatunchakuq runaman k’umuykusqankuta? Persiapi allin reqsisqa Hamanmi. Payqa munanmi Mardoqueopas k’umuykunanta. Kaypi rikusqayki hinan Mardoqueoqa tiyakushan, manan k’umuykunchu. Paypaqqa manan allinchu millay runaman k’umuykuyqa. Chaywanmi Hamanqa sinchita phiñakun. Yachasun ima ruwasqanta.

Hamanqa llullakuspan kamachikuqman imaymanata israelitakunamanta willan. ‘Millay runakunan kanku, manan kamachisqaykitapas kasukunkuchu, wañuchinan paykunataqa,’ nispa. Asueroqa manan yachanchu warminpas israelita kasqanta. Chaymi Hamanpa nisqanta uyarispa, kamachin huk p’unchaypi llapan israelitakunata wañuchinankupaq.

Chay kamachikuyta uyarispan Mardoqueoqa sinchita llakikun. Estermanmi kay willakuyta apachin: ‘Kamachiqta valekuy qespichiwananchispaq,’ nispa. Persiapi mana invitasqa kashaspa kamachiqpa kasqanman haykuqtaqa wañuchinkumanmi. Estermi ichaqa haykun mana invitasqa. Esterta rikuspan kamachiqqa qori tawnanta haywarin, chaywanmi yachanku mana wañuchinata. Esterqa, qosanta Hamantawan invitan hatun mikhuyman. Qosanmi Esterta tapun imapi yanapanan munasqanta. Hamanwan paqarin mikhuq hamuqtiykiñan willasayki, ninmi Esterqa.

Chay mikhuna haywasqanpin Esterqa kamachiqta nin: ‘Llaqtaytapas ñoqatapas llapaykutan wañuchiwanqaku,’ nispa. Chayta uyarispan kamachiqqa phiñakun. ‘¿Pin chayta ruwayta munan?,’ nispan tapun.

‘¡Awqayku, millay runaqa kay Hamanmi!,’ ninmi Esterqa.

Chaywanmi kamachiqqa anchata phiñakun. Chaymi kamachin Hamanta wañuchinankupaq. Chaymantan kamachiqqa Mardoqueota churan iskay kaq kamachiqta hina. Mardoqueon ruwachin mosoq kamachikuyta, chaypin nin israelitakunata wañuchinanku p’unchaypi, paykunapas kawsayninku rayku maqanakunankupaq. Mardoqueo allin reqsisqa kasqan raykun askha runa yanapan israelitakunata, chaymi paykunaqa qespichisqa kanku awqankunamanta.