Diosmi ángel Gabrielta kachamuran María sutiyoq allin sipaswan rimananpaq. Chay angelmi Mariaman willaran qhari wawa wachakunanta, paymi wiñaspa wiñaypaq kamachiq kanqa, nispa. Jesusqa uywakunaq kanchanpin naceran, chaymanmi michiqkuna visitaranku. Inti lloqsimuy cheqasmanta hamuq runakunata huk ch’aska Jesusman pusaran. Yachasunmi pin chay ch’askata rikuchiran, wañuchiy munasqankumanta Jesusta imayna qespichisqankutapas.

Chunka iskayniyoq watanpin Jesusqa yachachiqkunawan yupaychana wasipi rimaran. Chaymantan Jesusqa chunka pusaqniyoq wata qhepata bautizakuspa, qallariran Diospa kamachikuyninmanta predicayta yachachiytapas, chaypaqmi Diosqa kay Allpaman kachamusqa. Kay llank’aypi yanapanankupaqmi Jesusqa akllaran 12 runakunata, apostolninkuna kanankupaq.

Jesusqa ruwallarantaqmi askha milagrokunata. Waranqanpi runakunamanmi mikhuchiran iskay kinsa t’antallawan pisi challwallawan. Onqosqakunatan hanpiran, wañusqakunatapas kawsarichiranmi. Yachasunmi imakunan sucederan wañupunan p’unchay, imayna wañuchisqankutapas. Kinsa wata kuskanmi Jesusqa predicaran, chaymi kay SOQTA Kaq T’aqa willan 34 watapi imaymana sucedesqanta.