¿RIKUSHANKICHU kaypi huknin runa rikuchisqan ch’askata? Jerusalenmanta lloqsimuqtinkun kay ch’aska rikhurin. Kay runakunaqa Intiq lloqsimunan ladomantan hamunku, ch’aska qhawaqkunan. Paykunaqa yuyaykunku kay mosoq ch’askaqa allin reqsisqa runaman pusananta.

Jerusalenman chayaspan kay runakunaqa tapunku: ‘¿Maypin kashan judiokunaq kamachiqnin kananpaq naceq wawa?,’ nispa. “Judiokuna” nispan reqsillankutaq israelitakunata. ‘Intiq lloqsinan ladopin ch’askanta rikumuyku chaymi hamuyku yupaychanaykupaq,’ ninkun runakunaqa.

Chayta uyarispan Jerusalenpi kamachiq Herodesqa phiñakun. Payqa manan munanchu paypa rantinta huk kamachinanta. Chaymi umalliq sacerdotekunata tapun: ‘¿Maypin nacenan karan prometesqa kamachiq?,’ nispa. Paykunan kutichinku: ‘Belenpi ninmi Bibliaqa,’ nispa.

Intiq lloqsimunan ladomanta hamuq runakunatan Herodes nin: ‘Maskhamuychis wawata. Tarispaykichistaq willawankichis. Ñoqapas riytan munani yupaychanaypaq,’ nispa. ¡Herodesqa munaran wawata wañuchiytan!

Runakunaq ñawpaqentan ch’askaqa Belenkama rin, chaypin sayan wawaq kasqan wasi patapi. Wasiman haykuspan runakunaqa tarinku Mariata Jesús wawantawan. Regalokunatan qonku Jesusman. Chaymantan Jehová Diosqa mosqoyninkupi willan Herodesman amaña kutinankupaq. Chay raykun huk ñanninta llaqtankuman kutipunku.

Runakunaq ripusqanta yachaspan Herodesqa sinchita phiñakun. Chaymi kamachin Belenpi manaraq iskay watayoq qhari wawakunata wañuchinankupaq. Josemanmi ichaqa mosqoyninpi Jehová Dios willan, chaymi payqa familiantin Egiptoman ripun. Herodespa wañusqanta yachaspan Joseqa, Mariatawan Jesustawan pusarikuspa Nazaretman kutimun. Chaymi Nazaret llaqtapi Jesusqa wiñan.

¿Pin k’anchachiran chay mosoq ch’askata? Yuyariy, kay ch’aska rikuq runakunaqa Jerusalentan ñawpaqta riranku. Saqra Satanasmi munaran Diospa Churin wañuchiyta, yacharanmi Jerusalenpi kamachiq Herodespa wañuchiy munasqantapas. Chaymi Satanás kay ch’askata k’anchachinman karan.