KAYPI rikusqayki sipaschaqa 12 watayoqmi. Jesusmi makinmanta hap’ishan, sipaschaq tayta-mamanpas chaypin kashanku. ¿Ima raykun kusisqa kashanku? Chaymanta yachasun.

Kay sipaschaq taytanqa Jairo sutiyoq allin respetasqa runan. Huk p’unchaymi ususichan onqoruqtin puñunapi samachinku. Manan ichaqa qhaliyanchu astawanmi onqon. Jairopas warminpas anchatan llakikunku wañuy patallapiña sipascha kaqtin. Paymi sapallan ususichanku. Chaymi Jairoqa Jesusta maskhan. Payqa uyariranmi Jesuspa milagrokuna ruwasqanmanta.

Jesuspa kasqanman chayaspan Jairoqa rikun askha runakuna ukhupi Jesuspa kasqanta. Runakunaq chawpinta haykuspan Jairoqa Jesuspa ñawpaqenpi k’umuykun. ‘Ususichaymi sinchi onqosqa kashan. Ama hina kaspa hamuspa hanpiykapuway,’ nispan valekun. Risaqmi, ninmi Jesusqa.

Rishaqtinkun runakunaqa tanqanakunku payman asuykunankupaq. Qonqayllamantan Jesusqa sayaspa tapun: ‘¿Pin tupaykamuwan?,’ nispa. Jesusqa reparanmi atiynin lloqsisqanta, yachanmi huk runa tupaykusqantapas. ¿Pin tupaykuran? 12 wataña onqosqa warmin. ¡Paymi Jesuspa p’achanta tupaykuspa qhaliyasqa!

Kaywanmi Jairoqa kusirikun, rikunmi Jesuspaq onqosqakuna qhaliyachiyqa mana sasachu kasqanta. Chayllamanmi kachamusqanku runa, Jairota nin: ‘Amaña pusaychu Jesusta, ususichaykiqa wañupunñan,’ nispa. Chayta uyarispan Jesusqa Jairota nin: ‘Ama llakikuychu; qhaliyallanqan,’ nispa.

Jairoq wasinman chayaqtinkun runakunaqa khuyayta waqashanku. Jesusmi nin: ‘Ama waqaychischu. Sipaschaqa manan wañunchu. Puñushallanmi,’ nispa. Paykunan ichaqa Jesusta asipayanku, paykunaqa yachankun sipaschaq wañusqanta.

Sipaschaq cuartonmanmi Jesusqa haykun sipaspa tayta-mamanwan, kinsa apostolninkunapiwan. Makinmanta hap’ispan nin: ‘¡Sayariy!’ nispa. Chaymi payqa kawsarinpun, kaypi rikusqayki hina. ¡Sayarispan puririn! Chay raykun tayta-mamanpas ancha kusisqa kashanku.

Jesusqa manan chay sipasllatachu wañusqanmanta kawsarichiran. Ñawpaqtaqa kawsarichiran Naín llaqtapi tiyaq viudaq wawantan. Kawsarichiranmi Mariaq, Martaq turan Lazarotapas. Diospa churasqan rey hina kamachimuspan Jesusqa kawsarichinqa askha runakunata. ¿Manachu kay kusichiwanchis?