LLAKIKUNAPAQMI sucedesqan. Bautizaq Juantan wañurachinku. Kamachiqpa warmin Herodiasmi cheqnikuran. Chaymi kamachiqwan Juanpa umanta qhorochin.

Chaymanta uyarispan Jesusqa llakikun. Chaymi ch’inneqman sapallan rin. Runakunan ichaqa payta qatikunku. Askha runakunata rikuspan Jesusqa khuyapayan. Chay raykun willan Diospa kamachikuyninmanta, onqosqakunatapas hanpinmi.

Chay tutan qatikuqninkuna payta ninku: ‘Ñan tutayashanña, ch’inmi kay cheqasqa. Runakunata niy kay qayllapi huch’uy llaqtakunamanta mikhunata rantikamunankupaq,’ nispa.

‘Manan paykunaqa ripunqakuchu. Qankuna imallatapas qoychis mikhunankupaq,’ ninmi Jesús. Felipeman kutirispan Jesús tapun: ‘¿Maypin llapankupaq mikhunata rantimusunman?,’ nispa.

Felipe kutichin: ‘Askha qolqetan necesitasun chikachallantapas llapankupaq rantinapaqqa,’ nispa. Andresmi nin: ‘Mikhunanchis apaq waynachan apamun pisqa t’antata iskay challwakunatawan. Manan chayqa llapanchispaq aypanmanchu,’ nispa.

‘Q’achu patapi runakuna tiyachun,’ ninmi Jesús. Diosman graciasta qospan mikhunata rakin. Qatikuqninkunataq llapan runakunaman haywanku t’antata challwatawan. 5.000 qharikunan karan, kallarantaqmi waranqanpi warmikunapas wawakunapas. Llapankun mikhunku saksanankukama. ¡Puchuq mikhunata qatikuqninkuna huñuqtinkutaq, 12 canastaraq hunt’an!

Galilea qochata chinpanankupaqmi Jesusqa qatikuqninkunata boteman wichachin. Tutatan hatun wayrantin para chayan, chaymi boteta kay ladoman haqay ladoman aytikachan. Sinchitan qatikuqninkunaqa mancharikunku. Chayllamanmi tutapi rikunku unuq hawanta purispa paykunaman hamuq runata. Manchakuymantan qaparinku, manan yachankuchu ima kasqanta.

‘Ama manchakuychischu. ¡Ñoqan kani!,’ ninmi Jesús. Manan creenkuchu. Chaymi Pedroqa nin: ‘Señor, qan kaspaykiqa ununta purichiway qanman rinaypaq,’ nispa. Jesusmi kutichin: ‘¡Hamuy!,’ nispa. ¡Chaymi Pedroqa ununta purin! Mancharikuspa unuman chinkaykushaqtinmi Jesusqa aypaspa yanapan.

Chay qhepamanmi Jesusqa waranqanpi runakunaman hukmanta mikhuchillantaq. Kay kutipiqa qanchis t’antawan iskay kinsa challwakunallawan chayta ruwan. Kay kutipipas llapankupaqmi askha mikhuna kallantaq. ¡Sumaqmi Jesús runakunata qhawarisqan! ¡Pay kamachiqtinqa manañan imamantapas llakikusunchu!