SUYUNTINTA viajaspan Jesusqa, onqosqakunata hanpin. Lliw llaqtakunapin uyarinku kay milagrokunamanta. Chay raykun runakunaqa apanku such’ukunata, ñawsakunata, wist’ukunata, imaymana onqoyniyoqkunatawan. Jesusqa llapankutan hanpin.

Yaqa kinsa watañan pasan Jesusta Juanpa bautizasqanmanta. Apostolninkunamanmi Jesusqa willan Jerusalenman rinanta, chaypi wañuchinankuta wañusqanmanta kawsarinantapas. Chay p’unchay chayamunankaman onqosqakunata hanpishallan.

Huk kutinmi Jesusqa sábado p’unchaypi yachachishan. Sábado p’unchayqa judiokunaq samanan p’unchaymi. Kaypi rikusqayki warmin 18 wataña k’umuspalla puriran, manan atiranchu allin sayayta. Jesús llamiykuqtinmi warmiqa allinta sayarin. ¡Qhaliyanmi!

Kaywanmi religionpi umalliqkunaqa phiñakunku. Chaymi askha runakuna ukhumanta huknin qaparin: ‘Soqta p’unchaymi llank’anapaqqa. ¡Chay p’unchaykunapin hanpichikuq hamunanku, manan sábado p’unchaypichu!,’ nispa.

Jesusmi nin: ‘¡Millay runakuna! Qankunaqa sábado p’unchaypipas paskawaqchismi asnoykichista unuta ukyachinaykichispaq. ¿Manachu kay onqosqa warmi hanpisqa kanman 18 wataña onqosqa kasqanmanta?,’ nispa. Chay nisqanmi p’enqachin chay millay runakunata.

Chaymantan Jesusqa apostolkunantin Jerusalenta rin. Jericó llaqtaman chayashaqtinkun, limosna mañakuq iskay ñawsakuna qaparinku: ‘Jesús yanapaykuwayku,’ nispa.

Ñawsakunata waqyaspan Jesús tapun: ‘¿Ima ruwanaytan munankichis?,’ nispa. Paykunan ninku: ‘wiraqochay, kicharikuchun ñawiyku,’ nispa. Jesusmi llamiykun ñawinkuta, ¡chaymi qhawarinkupacha paykunaqa! ¿Ima raykun Jesús kay milagrokunata ruwan? Runakunata munakuspa, paypi iñinankuta munaspa. Kaywanmi yachanchis, Allpata kamachimuqtin manan pipas onqonqañachu.