QHAWARIY Jesusta, wawatan marq’arikushan. Rikusqayki hina payqa munakunmi wawakunata. Chay ruwasqanta qhawaq runakunaqa qatikuqninkunan. ¿Imaninmi Jesús paykunata?

Jesuspas apostolninkunawan kuska karu viajasqankumantan kutimunku. Ñanpin apostolninkuna atipanakunku. Chay raykun viajasqanku qhepata Jesusqa paykunata tapun: ‘¿Imamantan ñanpi atipanakusharankichis?,’ nispa. Jesusqa yachanñan imamanta atipanakusqankuta. Paykunataqa tapun willanqakuchu icha manachu chayta yachanallanpaqmi.

Ñanpiqa atipanakusharanku mayqenninku aswan hatun kasqanmanta, chay raykun mana kutichinkuchu. Wakinmi hukkunamanta aswan hatun kayta munanku. ¿Imaynatan Jesús yachachinqa hukkunamanta aswan hatun kay munasqanku mana allin kasqanta?

Huk wawata waqyaspan llapankuq ñawpaqenpi churan. Chaymantan qatikuqninkunata nin: ‘Kaytan allinta yachanaykichista munani: Manachus kay wawa hina kankichis chayqa, manan hayk’aqpas Diospa kamachikuyninman haykunkichischu. Kamachikuyniypi aswan hatun kaqqa kay wawa hina kaqmi,’ nispa. ¿Ima raykun chayta niran?

Huch’uy wawakunaqa manan yuyaykunkuchu hukkunamanta hatun kayta nitaq aswan allin reqsisqa kaytapas. Chay raykun qatikuqkunaqa yachananku wawakuna hina kayta, manan atipanakunankuchu aswan hatun kaymanta nitaq allin reqsisqa kaymantapas.

Huk kutikunapipas Jesusqa rikuchinmi wawakunapi interesakusqanta. Killakuna qhepatan wakin runakuna wawankuta Jesusman pusanku. Qatikuqkunan mana munankuchu asuykachinankuta. Jesusmi ichaqa nin: ‘Ama hark’aychischu, hinalla wawakunaqa ñoqaman hamuchunku, Diospa kamachikuyninqa wawa hina kaq runakunapaqmi,’ nispa. Chaymi wawakunata marq’arikuspa samincharan. ¡Allinmi wawakunata Jesuspa munakusqanta yachayqa!, ¿riki?