HUK kutinmi Jesusqa huk runata nin runamasinta munakunanpaq. Runan tapun: ‘¿Pin runamasiy?,’ nispa. Jesusqa yachanmi chay runaq yuyaykusqanta. Chay runaqa yuyaykun paypa llaqtanmanta, religionninmanta runakunalla runamasin kananpaqmi. Chay rayku yachasun Jesuspa imayna yachachisqanta.

Mayninpiqa rikch’anachiykunata willaspan Jesusqa yachachin. Chaytan ruwan. Huk rikch’anachiytan willan judío runamanta samaritano runamantawan. Ñan yachanchisña yaqa llapan judiokuna samaritanokunawan mana rimanakusqankuta. Kaymi chay rikch’anachiy:

Huk Kutinmi judío runa Jerusalenmanta Jericó llaqtaman risharan. Chaypin suwakuna maqaspa yaqa wañuchisqaku, qolqentapas suwasqaku.

Chayllamanmi judío sacerdote chay ñanninta risqa. Rikusqa maqasqa runata. ¿Imatan ruwasqa? Chinpallantan ripusqa. Chaymantan hamusqa religioso runa. Levitan karan. ¿Sayasqachu? Manan paypas sayasqachu chay runata yanapananpaq. ¿Rikushankichu sacerdotetapas levitatapas uray ñanpiña kasqankuta?

Qhawariy, pin maqasqa runawan kashan. Samaritano runan. Yanapashanmi kay judío runata. K’irinkunatan hanpishan. Chaymantan judío runata apan qorpachana wasiman, chaypi samaspa qhaliyananpaq.

Kay rikch’anachiyta willayta tukuspan, Jesusqa tapuqnin runata nin: ‘¿Mayqenninmi runamasin hina yanapan kay maqasqa runata? ¿Sacerdotechu, levitachu icha samaritanochu?,’ nispa.

Tapuqnintaq kutichin: ‘Samaritano, paymi allin runa karan maqasqa runawan,’ nispa.

Jesusmi nin: ‘Allintan kutichinki. Chay rayku qanpas huk runakunata yanapay chay samaritano hina,’ nispa.

Sumaqmi Jesuspa imayna yachachisqan. Ñoqanchispas askhatan yachasunman Bibliapi Jesuspa yachachisqanmantaqa, ¿riki?