SAMANANPAQMI Jesusqa tiyan Samaria p’uytuq qayllanpi. Qatikuqninkunaqa llaqtatan rinku mikhuna rantiq. Jesuswan rimaq warmiqa p’uytumanta unu horqoqmi hamun. Jesusmi nin: ‘Unuta qoway,’ nispa.

Kay nisqanmi warmita musphachin. ¿Ima rayku? Jesusqa judío runan, paytaq samaritana. Yaqa llapan judiokunaqa mana sumaqtachu qhawariqku Samaria llaqtapi runakunata. ¡Manan rimayullankupaschu! Jesusmi ichaqa munakun lliw runakunata. Paymi nin: ‘Sichus yachawaq unu mañakuqniyki pi kasqanta chayqa, qanmi paymanta unuta mañakuwaq, paytaq kawsachiq unuta qosunkiman,’ nispa.

‘Wiraqocha, p’uytuqa nishu ukhun, manama imawan aysanaykipas kanchu. ¿Maymantan horqowaq kawsachiq unuta?,’ ninmi warmiqa.

‘Kay p’uytumanta unuta ukyanki chayqa hukmantan ch’akisunki, ñoqaq qosqay unun ichaqa wiñaypaq kawsachisunkiman,’ ninmi Jesús.

‘Wiraqochay, ¡chay unuta qoykuway! Chaymi manaña hayk’aqpas ch’akichikusaqchu. Nitaq kay p’uytutapas hamusaqñachu unu apanaypaq,’ nispan nin warmi.

Warmiqa yuyaykun ukyana unumanta Jesuspa rimananta. Payqa rimashan Bibliapi cheqaqmantan, Diospa kamachiyninmantawan, chayqa unu hina kawsay qoqmi. Arí wiñay kawsaytan qonman.

Jesusmi warmita nin: ‘Qosaykita waqyamuy hinaspa kayman kutimuy,’ nispa.

‘Manan kanchu qosayqa,’ ninmi.

‘Allintan kutichinki,’ ninmi Jesús, ‘Pisqa qosayoqmi karanki, kunan tiyasqayki qharitaq manan qosaykichu,’ nispa.

Warmiqa musphanmi Jesuspa cheqaq nisqanwan. ¿Imaynapin Jesús kaykunata yacharan? Jesusqa Diospa kachamusqan runan, chay raykun Diosqa imatapas payman willan. Kutimuspan qatikuqninkunaqa musphanku samaritana warmiwan rimasqanta rikuspanku.

¿Imatan kaykunamanta yachanchis? Jesús llapa runapaq sumaq sonqo kasqanta. Ñoqanchispas chhaynallataqmi kananchis; manan huk llaqtamanta kasqan raykuchu millay runata hina qhawarinanchis. Jesusqa munan wiñay kawsayman apaq yachayta llapa runaq reqsinantan. Ñoqanchistaq runakunata yanapananchis yachanankupaq.