QHAWARIY kay runaq umanman tiyaykamuq palomata. Chay runaqa Jesusmi. Ñan 30 watayoqña. Paywan kaqtaqmi Juan. Ñan paymantaqa yacharanchisña. ¿Yuyashankichu Elisabetta María visitaqtin, Elisabetpa wiksanpi kusikuymanta saltaq wawata? Chay wawaqa Juanmi karan. ¿Imatan ruwashanku Juanwan Jesuswan?

Jordán mayupin Juanqa Jesusta unupi chinkaykachin. Chhaynatan bautizanku. Unupi chinkaykachispan unumanta hoqarinku. Chaytan Juan ruwan; chay raykun Bautizaq Juan, nispa sutichanku. ¿Ima raykun Jesusta bautizan?

Jesuspunin munaran Juanpa bautizananta, chaymi payqa Jesusta bautizan. Juanqa bautizan huchankumanta pesapakusqankuta rikuchiy munaq runakunatan. ¿Huchallikuranchu Jesús huchamanta pesapakunanpaq? Manan, Jesusqa manan hayk’aqpas huchallikuranchu, payqa Diospa Churinmi, hanaq pachamantan hamuran. Kanmi huk razón bautizachikunanpaq. Chayta yachasun.

Manaraq Juanman hamushaspan Jesusqa carpintero karan. Carpinteroqa k’aspimantan ruwan mesakunata, sillakunata, tiyanakunatapas. Mariaq qosan Josemi carpintero karan, paymi Jesusman yachachiran chay ruwayta. Diosqa manan carpintero kananpaqchu kay Allpaman Churinta kachamuran. Huk ruwanatan payman qon, chaypaqmi tiempo chayamun. Chaymi, Jesusqa Taytanpa munaynin ruwananpaq hamusqanta rikuchinanpaq Juanwan bautizachikun. ¿Kusikunchu Dios chay ruwasqanwan?

Arí, chaymi unumanta Jesús lloqsiqtin, hanaq pachamanta uyarikun Diospa rimasqan: ‘Payqa Churiymi, paymi kusichiwaqniy,’ nispa. Hanaq pachapas kicharikunman hinan chayninta kay paloma Jesusman uraykamun. Manan ichaqa cheqaq palomachu. Rikch’akullanmi palomaman. Chayqa Diospa santo espiritunmi.

Imaymanapi yuyaykunan kaqtinmi Jesusqa ch’inneqman rin 40 p’unchay. Chaypin Satanasqa payman asuykun. Kinsa kutitan Satanasqa Diospa kamachikuynin contrapi huchallichiyta munan. Manan Jesusqa chayta ruwanchu.

Chaymantan Jesusqa llaqtaman kutin chaypin reqsin ñawpaqkaq qatikuqninkunata. Wakinmi: Andrés, Pedro (Simón sutiyoq), Felipe, Natanael (Bartolomeo sutiyoq). Paykunawanmi Jesús rin Galilea distritota. Chaypin qhepakunku Natanaelpa tiyasqan Caná llaqtapi, chaypin casarakuypi Jesusqa ñawpa kaq milagrota ruwan. ¿Iman karan? Unutan vinoman tukuchin.