QHAWARIY kuraq runakunawan rimaq waynachata. Paykunaqa Jerusalenpi Diospa yupaychana wasinpi yachachiqkunan. Chay waynachataqmi Jesús. Ñan allintaña wiñarun, kunanqa 12 watanpiñan.

Diosmantapas Bibliamantapas Jesuspa askha yachasqanwanmi, kamachikuy simita yachachiqkuna anchata muspharanku. Ichaqa, ¿ima raykun mana chaypichu Mariapas Josepas? ¿Maypin kashanku? Chaymanta yachasun.

Sapa watanmi Joseqa familianta pusan Jerusalenman Pascua fiestata yuyarinankupaq. Nazaretmanta Jerusalenman chayanapaqqa karutan purina. Chay tiempopiqa manan karanchu carropas, trenpas. Yaqa llapankun chakillapi puriranku, chaymi paykunapas kinsa p’unchaypi hina Jerusalenman chayanku.

Joseqa ñan askha wawayoqña. Chaymi qhawanan Jesuspa sullk’a wayqe-panankunata. Kay watapin Josepas Mariapas wawakunantin Nazaretman kutipushanku. Paykunaqa yuyaykunku Jesusqa llaqtamasinkunawan kuska rinanpaqmi. Huk p’unchaytaña purispa samaqtinkun Jesustaqa mana tarinkuchu. ¡Familiakunata amigokunata tapuspan maskhanku, manan ichaqa tarinkuchu! Chaymi Jerusalenta kutirinku chaypi maskhanankupaq.

Chaypin tarinku. Jesusqa yachachiqkunata uyarispan paykunata tapushan. Uyariqkunaqa musphankuraqmi yachasqanwan. Marian nin: ‘Wawalláy, ¿ima raykun kayta ruwawankiku? Taytaykipas ñoqapas sinchi llakisqan maskhamushaykiku,’ nispa.

‘¿Ima raykun maskhamuwarankichis? ¿Manachu yacharankichis Taytaypa wasinpi kanayta?,’ nispan Jesús kutichin.

Arí, maypichus Diosmanta yachanku, chaypin Jesusqa kayta munan. Ñoqanchispas chhaynan kananchis, ¿riki? Nazaretpiqa sapa semanan Jesusqa riran Diosta yupaychanapaq huñunakuyman. Allin uyariq kasqan raykun payqa Bibliamanta askhata yacharan. Ñoqanchispas Jesús hina kananchis.