QHAWARIY cárcel punku kichaq angelta. Jesuspa apostolninkunatan kacharishan. ¿Ima raykun carcelpi kasharanku?

Pisi tiempollaraqmi pasan Jesuspa qatikuqninkuna santo espíritu chaskisqankumanta. Kaymi suceden: Huk tarden Juanwan Pedrowan rinku Jerusalenpi yupaychana wasita. Chaypin, punkuq haykunanpi tarinku such’u runata, payqa nacesqanmantapachan chhayna kasqa. Sapa p’unchaymi chayman apanku yupaychana wasiman haykuqkunamanta limosna mañakunanpaq. Juantawan Pedrotawan rikuspan paykunamantapas limosnata mañakun. ¿Imatan paykuna ruwanku?

Sayaspan qhawanku. ‘Manan qolqey kanchu,’ ninmi Pedro, ‘ichaqa imachus kapuwaqniytan qosayki. ¡Jesucristoq sutinpi, sayarispa puriy!’ nispa Pedroqa paña makinmanta runata aysarin, chaymi payqa usqhaylla sayarispa puriyta qallarin. Chay milagro ruwasqanmi runakunata musphachispa kusichin.

‘Jesusta kawsarichiq Diospa atiyninwanmi kay milagrotaqa ruwayku,’ ninmi Pedro. Paypas Juanpas rimashaqtinkun, hamunku religionpi umalliqkuna. Jesusmi kawsarin, nispa willasqankumantan phiñasqa kashanku. Chaymi iskayninkuta carcelman apanku.

Paqaristinmi religionpi umalliqkuna huñukunku. Pusamunkun Pedrota, Juanta, hanpisqanku runatawan. ‘¿Ima atiywanmi kaykunata ruwarankichis?,’ nispan tapunku.

Jesusta kawsarichiq Diospa atiyninwanmi, nispan Pedro kutichin. Sacerdotekunaqa manan ima ruwaytapas atinkuchu, manataqmi negankumanchu chay milagro rikusqankutapas. Chay raykun, apostolkunata kacharispa kamachinku amaña Jesusmanta rimanankupaq.

Apostolkunaqa predicashallankun Jesusmanta, onqosqakunatapas hanpishallankun. Kay milagrokuna ruwasqankumantan lliw llaqtakunapi yachanku. Chay raykun Jerusalenpa qayllanpi llaqtakunamantapas onqosqakunata apanku apostolkunaq hanpinanpaq. Chaymi religionpi umalliqkunaqa apostolkunata cheqnipakuspa carcelpi wisq’anku. Chayllamanmi huk sucedellantaq.

Tutatan Diospa angelnin cárcel punkuta kichan, kaypi rikusqayki hina. Angelmi nin: ‘Ripuychis, hinaspa yupaychana wasipi sayaspa runakunaman predicamuychis,’ nispa. Apostolkunata pusamunankupaq soldadokunata paqaristin kachaqtinku, apostolkunaqa manaña chaypichu kanku. Chaymantañan yupaychana wasipi tarispa pusanku sala del Sanedrín nisqaman.

‘Jesusmanta amaña rimanaykichispaqmi kamachiraykichis,’ ninkun religionpi umalliqkunaqa. ‘Qankunan ichaqa Jerusalenta hunt’achinkichis yachachiyniykichiswan,’ nispa. Apostolkunan kutichinku: ‘Diostan kasukunayku kamachiqniykuta hina manan runakunatachu,’ nispa. Chaymi paykunaqa predicashallanku. ¡Paykunaqa allin ejemplon ñoqanchispaqqa!