QONQORIKUQ runaqa Estebanmi. Jesuspa hunt’aq qatikuqninmi. ¡Qhawariy kaypi ruwasqankuta! Hatun rumikunawanmi ch’aqeshanku. ¿Ima raykun Estebanta chhaynaniraqta cheqnikunku? Chaymantan yachasun.

Diosmi Estebantaqa yanaparan milagrokuna ruwananpaq. Kay runakunan ichaqa mana kusikunkuchu paypa ruwasqanwan, chaymi paywan atipanakunku Bibliamanta runakunaman yachachisqanmanta. Diosmi ichaqa Estebanman qon allin yachayta, chaymi Estebanqa reparachin chay runakuna llullakuspa yachachisqanta. Kaywanmi astawanraq phiñakunku, payta hap’ispan huk runakunata waqyanku paymanta mana kaqta rimanankupaq.

Uma sacerdoten tapun: ‘¿Cheqaqchu chay rimasqanku?,’ nispa. Estebanqa kutichin Bibliamanta allin discursowanmi. Chay discurso qhepatan nin, ñawpa tiempopipas millay runakunaqa cheqnikurankun Diospa profetankunata, nispa. Nillantaqmi: ‘Qankunapas chhaynallataqmi kankichis. Diospa churin Jesustan wañuchirankichis Diospa kamachikuyninkunatapas manan kasukurankichischu,’ nispa.

¡Kaymi sinchita phiñachin umalliq religiosokunata! Phiñakuspan kirunkutaraq k’utupakunku. Hanaq pachata qhawarispa Esteban nin: ‘¡Qhawariychis! Hanaq pachapin rikuni Jesusta Diospa paña ladonpi sayashaqta’ nispa, chayta uyarispan kay runakunaqa ninrinkuta wisq’akuspa Estebanta hap’inku. Chaymantataq llaqta hawaman aysanku.

Kaypin hawa p’achankuta ch’utikuspa, Saulo waynaman qonku hap’inanpaq. ¿Rikushankichu Saulota? Chaymantan kay runakunaqa Estebanta rumiwan ch’aqenku. Kaypi rikusqayki hinan payqa qonqorikuspa Diosmanta mañakun: ‘Jehová Dios, ama huchachaychu kay mana allin ruwasqankumantaqa,’ nispa. Payqa yachanmi wakin runakunaqa umalliq religiosokunawan q’otuchikusqankuta. Chay qhepamanmi Estebanqa wañupun.

Pipas mana allinta ruwasuqtiyki, ¿kaqtachu kutichiyta munanki, icha Diostachu mañakunki payta muchuchinanpaq? Jesuspas Estebanpas manan chaytachu ruwaranku. Paykunaqa allin runan karanku mana allin ruwaqninkunapaqpas. Ñoqanchispas paykuna hinan kananchis.