MANARAQ hanaq pachaman kutishaspan Jesusqa askha kutita rikhuriran qatikuqninkunaman. Huk kutipin rikuranku 500 qatikuqninkuna. ¿Imamantan Jesús rimaran paykunaman rikhurispa? Diospa kamachikuyninmanta. Jehová Diosqa Jesusta kay Allpaman kachamuran Kamachikuyninmanta yachachinanpaqmi. Kawsarisqan qhepamanpas Jesusqa chaytan ruwashallan.

¿Yuyashankichu iman Diospa reinon? Hanaq pachapi Diospa kamachikuyninmi, Jesustataq Dios Akllan kamachinanpaq. ¡Yachasqanchis hina, kay Allpapi kashasparaqmi Jesusqa rikuchiran sumaq kamachikuq kasqanta, yarqasqakunaman mikhuchispa, onqosqakunata hanpispa, wañusqakunatapas kawsarichispa!

Chay rayku, hanaq pachamanta waranqa wata Jesús kamachiqtin, ¿iman sucedenqa Allpapi? Arí, Allpaqa sumaq paraisomanmi tukunqa. Manañan kanqachu maqanakuypas, wañuchinakuypas, onqoypas, wañuypas. Chhaynapunin kanqa, Diosqa chaypaqmi Allpata ruwaran runakuna paraisopi tiyananpaq. Chay raykun ruwaran Edén huertatapas. Jesusmi ruwanqa Diospa munayninta.

Ñan tiempoña Jesús hanaq pachaman kutipunanpaq. 40 p’unchaymi qatikuqninkunaman rikhuriran, chaywanmi paykunaqa yachanku Jesuspa kawsasqanta. Manaraq ripushaspan paykunata nin: ‘Jerusalenpi qhepakuychis santo espirituta chaskinaykichiskama,’ nispa. Kayqa Diospa kallpanmi, phukumuq wayra hinan, chaymi qatikuqninkunata yanapanqa Diospa munayninta ruwanankupaq. Ripunanpaq kashaqtinmi Jesús nin: ‘Allpantinpin ñoqamanta predicankichis,’ nispa.

Chayta nispan musphanapaq suceden. Hanaq pachamanmi ripun, kaypi rikusqayki hina. Phuyu pakaqtinmi qatikuqninkunaqa manaña rikunkuchu. Hanaq pachaman kutipuspan Jesusqa Allpapi qatikuqninkunata kamachimun.