KAY runakunaqa Jesuspa qatikuqninkunan. Paypa nisqanta kasukuspan Jerusalenpi qhepakunku. Llapanku suyashaqtinkun, sinchi wayraq qaparisqan hina wasita hunt’an. Sinchi wayra hinan usqhaylla pasan. Chaymantan rikhurin sapanka runaq umanpi nina rawrashaq qallukuna hina. ¿Rikushankichu sapanka qatikuqkunaq umanpi ninata? ¿Imataq chayri?

¡Milagron chayqa! Jesusqa hukmantan Taytanwan hanaq pachapi kashan, chaymi kunanqa santo espirituta qatikuqninkunaman qomushan. ¿Imaynatan chay espíritu paykunata yanapan? Llapankun rimanku imaymana simikunapi.

Jerusalenpi askha runakunan uyarinku wayraq qaparisqanta hina, chaymi qhawaq rinku. Wakin runakunaqa huk suyukunamantan Jerusalenta hamunku Pentecostés fiestapaq. ¡Anchatan muspharinku huk suyukunamanta hamuqkunaqa! Jesuspa qatikuqninkunaqa paykunaq rimasqan simikunapin willanku Diospa ruwasqan sumaq willakuykunamanta.

‘Kay runakunaqa Galileamantan kanku. ¿Imaynapin rimashanku suyunchispi rimasqanchis simikunata?’ ninkun huk suyukunamanta hamuqkunaqa.

Sayarispan Pedro rimayta qallarin. Willanmi runakunaman imaynatan Jesusta wañuchiranku, Jehová Diospa kawsarichisqantapas. ‘Kunanqa hanaq pachapin Jesusqa kashan, Diospa paña ladonpi. Paymi prometesqan santo espirituta kachaykamun. Chay raykun kay milagrokunaqa suceden,’ ninmi.

Kaykunata Pedro willaqtinmi, uyariqkunaq sonqon anchata nanaran, Jesusta runakuna imaymana ruwasqankumanta. ‘¿Imatan ruwanayku?,’ nispan tapunku. Pedron kutichin: ‘Ñawpa kawsayniykichista saqespa bautizakuychis,’ nispa. Chay p’unchaypin bautizakunku 3.000 runakuna, chhaynapin Jesuspa qatikuqnin kanku.