¡QHAWARIY, barcon unuman chinkaykushan! ¡P’akikushanmi! ¿Rikushankichu barcopi kaq runakunata unuman p’itaykusqankuta? Wakinqa ch’aki pampapiñan kashanku. ¿Chaypichu Pablo kashan? Yachasun ima sucedesqanta.

Yuyariy, ñan iskay wataña pasan Cesarea carcelpi Pablota wisq’asqankumanta. Chaymantan huk presokunatawan Pablotaqa Roma suyuman barcopi apashanku. Creta isla qayllanpin hatun wayra parantin paykunata hap’in. Manan runakunaqa barcota manejayta atinkuchu. Manan p’unchaypi Intita rikunkuchu nitaq tutapi ch’askakunatapas. Askha p’unchaykuna qhepatan barcopi kaqkunaqa yuyaykunku manaña qespinankupaq.

Chaymi Pabloqa sayarispa nin: ‘Manan mayqenniykichispas wañunkichischu; barcollan chinkanqa. Ch’isin Diospa angelnin ñoqaman hamuspa niwan: “¡Pablo ama manchakuychu! Chayankin Romapi kamachiq Cesarpa ñawpaqenpi kanaykipaq. Diosmi qespichinqa qanwan viajaqkunatapas,”’ nispa.

¡Wayrantin hatun paraq qallarisqanmantapacha 14 p’unchaypi, kuska tutata hina barcopi kaqkuna reparanku allpaman qayllaykusqankuta! Qaqakunawan tupaspa urmayunankuta manchakuspan anclata wikch’unku barco sayananpaq. Tutamantanmi islata rikunku. Chaykaman barcota apayta munanku.

Playaman asuykushaqtinkun barcoqa aqoman chayaspa chayllapi sayan. Chaymi lamar-qocha phoqchiqesqanwan barcota waqtan, barcotaq p’akikun. Chay barcopi oficialmi, nin: ‘Yachaqkunaqa llapaykichis lamar-qochaq patankama nadaychis; wakintaq lamar-qochaman p’itaykuspa barcomanta puchuq tablakunapi tuytuspa riychis,’ nispa. Chayta ruwaspan, barcopi viajaq 276 runakunaqa llapallanku qespinku angelpa prometesqan hina.

Chay islaq sutinmi Malta. Chaypi runakunaqa sumaqmi kanku, yanapankun barcomanta qespiqkunata. Tiempo allinyaqtintaq Pablota huk barcopi Roma suyuman apanku.