QHAWARIY Pabloq makinpi cadenata, qhawarillaytaq chay soldadotapas, Pablotan qhawashan. Romapin Pabloqa preso kashan. Chaypin suyashan Romapi kamachikuq juzgananta. Carcelpiqa haykuchillankun visitakunata.

Romapi kinsa p’unchay kashaspañan Pabloqa, umalliq judiokunata waqyachin visitanankupaq. Chay raykun askha judiokuna hamunku. Paykunamanmi Pabloqa predican Jesusmanta, Diospa kamachikuyninmantawan. Wakinmi iñispa cristianoman tukunku, wakintaq mana.

Pabloqa predicanmi payta qhawaq soldadokunamanpas. Carcelpi iskay wata kaspanmi Pabloqa predican lliw atisqan runakunaman. Chay raykun kamachikuqpa wasinpi kaqkunapas predicasqanta uyarispa, wakinqa cristianoman tukunku.

¿Pin kaypi tiyaspa qelqaq? Payqa Timoteon. Paypas preson karan Diospa kamachikuyninmanta predicasqan rayku, kunanqa kacharipunkuñan. Pablota yanapananpaqmi hamun. ¿Imatan qelqashan? Chaymanta yachasun.

¿Yuyashankichu 110 Willakuypi Filipos, Éfeso llaqtakunamanta? Pablon yanaparan chay llaqtakunapi congregacionkuna qallarinanpaq. Pabloqa carcelmantan cartata qelqashan chay llaqtakunapi wayqe-panakunaman. Efesios, Filipenses sutiyoq cartakunaqa Bibliapin kashan. Pablo Timoteota nishan Filipospi cristiano amigonkunaman ima qelqanantapas.

Filipospi cristianokunaqa sumaqtan Pablota qhawariranku. Carcelpi kashaqtinpas regalotan apachinku, chaymantan Pablo agradecekushan. Epafroditon chay regalota apamuran. Sinchita onqospan payqa yaqalla wañuran. Kunanqa qhaliñan kashan, ñan llaqtanman kutipunqaña. Paymi apanqa Pablowan Timoteowan qelqasqanku cartata.

Carcelpi kashaspan Pabloqa qelqallantaq Bibliapi kaq iskay cartakunata. Hukninmi Colosas llaqtapi cristianokunapaq. ¿Iman sutin? Colosenses. Huknintaq, Colosas llaqtapi tiyaq amigon Filemonpaq. Chay cartaqa riman Onesimomantan, payqa karan Filemonpa kamachinmi.

Onesimoqa Filemonpa wasinmanta chinkaspan Romata riran. Chaypin yachasqa Pablo carcelpi kasqanta. Watukuq riqtinmi Pabloqa payta predicasqa. Pisi tiempollapin Onesimoqa cristianoman tukusqa. Cristiano kaspanmi Onesimoqa pesapakun chinkakamusqanmanta. Chay rayku, ¿ima ninmi Pablo Filemonta kay cartapi?

Pablo Filemonta nishan Onesimota panpachananpaq. ‘Kutichinpushaykin,’ nispan Pablo qelqan. ‘Kunanmi ichaqa manaña kamachillaykichu. Allin cristiano wayqenchismi,’ nispa. Colosasta kutispan Onesimoqa iskaynin cartakunata apan, hukta Colosaspi congregacionman huknintataq Filemonman. ¡Anchatachá Filemonqa kusikuran, kamachin Onésimo kunanqa cristiano masin kasqanmanta!

Filipospi, Colosaspi cristianokunaman qelqaspaqa, allin willakuykunatan Pabloqa willan. Filipospi kaqkunatan nin: ‘Timoteotan kachamushaykichis. Ñoqapas hamusaqñan,’ nispa. Filemontan nin: ‘Cuartota allichapuway chaypi qorpachakunaypaq,’ nispa.

Carcelmanta lloqsispan Pabloqa yaqa lliw wayqe-panakunata visitan. Qhepamanmi Pablotaqa Roma carcelpi hukmanta wisq’allankutaq. Yachanmi wañuchinankuta. Chay raykun Timoteoman qelqan usqhaylla hamunanpaq. ‘Tukuy sonqoywanmi Diosta servirani, payqa saminchawanqan,’ nispan qelqan. Pabloq wañusqan watakuna qhepallamanmi Jerusalenta romanokuna thunichinku.

Bibliapiqa kanraqmi imaymanakuna. Jehová Diosmi apóstol Juanwan qelqachin qhepa kaq librokunata, hukninmi Apocalipsis sutiyoq. Chay libron willan hamuq tiempomanta. Yachasun hamuq tiempopaq prometewasqanchista.