PABLOWAN kuska kaypi rikusqayki waynaqa Timoteon. Listra llaqtapin Timoteoqa familianwan tiyan. Mamanpa sutinmi Eunice, hatun mamantaq Loida.

Kaywanqa kinsa kutitaña Pablo visitan Listra llaqtata. Yaqa wata ñawpaqta hinan Pablowan Bernabewan kaypi predicayta qallariranku. Kunanqa amigon Silaswanmi Pabloqa kutimun.

¿Ima ninmi Pablo Timoteota? Ninmi: ‘¿Munawaqchu Silaswan ñoqawanpas viajayta? Yanapawankikumanmi karu llaqtakunapi tiyaq runakunaman predicayta,’ nispa.

‘Arí, munanin,’ nispan kutichin Timoteo. Chaymi pisi tiempollamanta familianta saqespa Timoteoqa Pablowan Silaspiwan ripunku. Ñawpaqta ichaqa yachasun Pablota ima sucedesqanmanta. 17 watañan pasan Damasco llaqtapi Pabloman Jesuspa rikhurisqanmanta.

¡Yacharanchisñan Jesuspa qatikuqninkuna qatiykachananpaq Damasco llaqtata Pabloq risqanta, kunanqa paypas Jesuspa qatikuqninmi! Chay qhepamanmi awqankuna Pablota maskhanku wañuchinankupaq, cristiano masinkunan ichaqa yanapanku Pablo ayqekunanpaq. Llaqtaq perqanta canastapi urayachiqtinkun Pabloqa ripun.

Chaymantan Pabloqa viajan Antioquía llaqtata chaypi predicananpaq. Kaypin qatikuqkunata cristiano nispa sutichayta qallarinku. Antioquía llaqtapin kamachinku Pablotawan Bernabetawan karu suyukunata predicaq rinankupaq. Timoteoq tiyasqan Listra llaqtatapas visitankun.

Yaqa watamantan Pabloqa iskay kaq viajenpi kutin Listra llaqtata. Chaymantan viajanku Pablopas Silaspas Timoteopas, ¿yachankichu maytan rinku? Mapata qhawarispa yachasun.

Ñawpaqtaqa, Iconio llaqtatan rinku chay llaqtaqa qayllallapin kashan, chaymantataq Antioquía llaqtata. Chay qhepamantaq viajanku Troas, Filipos, Tesalónica, Berea llaqtakunata. ¿Rikushankichu Atenas llaqtata mapapi? Chaypin Pablo predican. Chaymantan huk wata kuskan Corintopi predicanku. Éfeso llaqtapitaq pisi tiempolla qhepakunku. Chaymanta Cesarea llaqtaman barcopi kutimuspa, rinku Antioquía llaqtaman, chaypin Pablo qorpachakun.

Chhaynapin Timoteoqa Pablowan viajan pachakninpi kilometrota “allin willakuykunata” predicaspa congregacionkunatapas qallarichispa. Wiñaspayki, ¿Timoteo hinachu qanpas hunt’a sonqowan Diospa munayninta ruwanki?