APÓSTOL Pedro kaypi sayashan, qhepanpitaq amigonkuna. ¿Ima raykun kay runa Pedroq ñawpaqenpi qonqorikushan? ¿Ruwananchu chayta? ¿Yachankichu pin chay runa?

Chay runaqa Cornelion. Roma ejercitopi oficialmi. Cornelioqa manan reqsinchu Pedrota, huk angelmi ichaqa Corneliota kamachin wasinman pusamunanpaq. Yachasun chaykunaq imayna sucedesqanta.

Qallariypiqa judiokunallan Jesuspa qatikuqninkuna karanku, Cornelion ichaqa mana judío runachu. Ichaqa Diostan munakun, payllamantan mañakun, runakunapaqpas allinkunatan ruwan. Huk tarden payman rikhurispa huk ángel kayta nin: ‘Kusikunmi Dios qanwan, chaymi payqa mañakusqaykita kutichinqa. Pusachimuy Pedro sutiyoq runata. Jope llaqtapin kashan, lamar-qochaq qayllanpi Simonpa wasinpi,’ nispa.

Chaytan ruwan Cornelioqa. Paqaristinmi Pedroqa kashan Simonpa wasin patapi. Chaypin Diosqa huk rikhuriyta rikuchin hanaq pachamanta hatun tela mast’arikamuqta. Chay telapin rikun imaymana animalkunata. Diospa kamachikuy siminmi hark’aran chay qhelli animalkuna mikhuyta, huk kunkan ichaqa nin: ‘Pedro chay animalkunata wañuchispa mikhuy,’ nispa.

¡‘Manan!’ ninmi Pedro. ‘Manan hayk’aqpas chay qhelli animalkunataqa mikhuranichu,’ nispa. Kunkan nin: ‘Manan qhelli ninaykichu Diospa ch’uyanchasqantaqa,’ nispa. Kinsa kutitan rimapayamun. Chay rikhuriy ima ninanpi Pedro yuyaykushaqtinmi, Cornelioq kachamusqan runakuna wasiman chayanku.

Urayuspan Pedro nin: ‘Ñoqan kani maskhasqaykichis runa. ¿Ima raykun hamurankichis?,’ nispa. Chaymi runakunaqa willanku Cornelioman angelpa nisqanta Pedrota wasinman waqyachinanpaq, Pedroqa kasukuspan paykunawan riran. Paqaristinmi rinku Pedropas amigonkunapas Cesarea llaqtapi Cornelioq wasinta.

Cornelioqa wasinpin huñurun familianta amigonkunatawan. Pedro chayaqtinmi Cornelioqa Pedroq ñawpaqenpi qonqorikun, kaypi rikusqayki hina. Pedron ichaqa nin: ‘Sayariy; ñoqaqa runallan kani,’ nispa. Arí, Biblian yachachin runakuna yupaychanapaq qonqorikuyqa mana allin kasqanta. Jehová Diosllatan yupaychananchis.

Chaypi kaqkunamanmi Pedroqa predican. ‘Kunanqa entiendenin, Diosta serviy munaq runakunata paypa chaskisqanta,’ ninmi Pedro. Pay rimashallaqtinraqmi Diosqa santo espiritunta paykunaman qomuran, chaymi chay runakunaqa huk simikunapi rimayta qallarinku. Chaymi musphachin Pedrowan hamuq judío qatikuqkunata, paykunaqa yuyaykunku paykunaq llaqtallanmanta runakunata Diospa chaskinanpaq. Kaykuna sucedesqanmi paykunata yachachin lliw llaqtamanta runakuna Diospaqqa kaqkama kasqanta. Llapanchismi kaytaqa yuyarinanchis.