QHAWARIY hatun sach’akunata, munay t’ikakunata, hatun orqokunatapas. ¿Munaychachu kaypi rikusqayki? Qhawariy, tarukachan wawaq makinmanta mikhushan. Qhawariy leonkunatapas caballotapas sumaq q’achu pampapin kashanku. ¿Munawaqchu chhayna allpapi tiyakuyta?

Diosqa munanmi kay Allpa sumaq paraíso kaqtin, chaypi mana imamanta ñak’arispa wiñaypaq tiyakunaykita. Chaytan Bibliaqa prometen mosoq paraisopi tiyaqkunapaq. ‘Diosmi paykunawan kanqa. Manan wañuypas, waqaypas, nanaypas kanqachu. Millay kawsayqa manañan kanqachu,’ nispa.

Jesusmi chaykunata ruwanqa. ¿Yachankichu hayk’aqmi chayta ruwanqa? Arí, millay runakunatapas, millay kawsaytapas kay Allpamanta tukuchispan. Yuyariy, kay Allpapi kashaspan Jesusqa runakunata hanpiran imaymana onqoymanta, wañusqakunatapas kawsarichiranmi. Chhaynapin rikuchiran Kamachikuq kaspa imaymanakuna ruwananta.

¡Sumaqmi kanqa chay mosoq paraisopi kawsayqa! Jesusmi akllasqan runakunawan hanaq pachamanta kamachimunqa. Kay Allpapi runakunatan yanapamunqaku llapankupas kusisqa kanankupaq. Yachasun imatan ruwananchis chay mosoq paraisopi wiñayta kawsananchispaq.