Juliamanta yachasunchis. Payqa sinchi gorda kananpaqsi piensakun, chaysi espejopi sapa qhawaykuspaqa “wirallañamá kashani” nispa piensan. Ichaqa flacachallas payqa, chaysi tayta-mamanpas amigankunapas ninku: “K’aspimá kashanki”. nispa.

Chaywanpas Juliaqa bajaytapunis munashan pesonta, chaypaqsi iskay kinsa p’unchay manaña imatapas mijunqachu...

Julia kaspa, ¿imatan ruwawaq?

Munaycha rikukuyta munayqa manan juchachu. Bibliaqa allintan willan wakin sumaq rijch’ayniyoq runakunamanta. Wakinmi karan Sara, Raquel, Abigail, José, Davidpiwan. Bibliaqa willanmi Abisag sutiyoq sipasmantapas, payqa ‘ancha sumaq rijch’ayniyoqsi’ kasqa (1 Reyes 1:4).

Ichaqa manan allinchu kanman nishuta rijch’ayninchismanta preocupakuyqa. Kaykunatan yachanayki:

• Askha sipaskunata estudiaspan kayta yachakuran: Paykunamanta kuskan masmi piensaqku pesonkuta bajananku kasqanta. Ichaqa pisillan cheqaqpaq bajananku karan.

• Chaymantapas askha flaca warmikunamanta yaqa kuskanmi nishu gordapaq piensakuqku.

• Pesonkuta bajayta munaspan wakin wayna-sipaskunaqa “anorexia” nisqa onqoywan jap’ichikushanku, chay onqoyniyoqkunaqa manañan mijuyta munankuchu, wakinqa hasta wañuymanraqmi chaywan chayanku.

 Chay onqoywan otaq chay jina onqoywan kashanaykipaq piensakunki chayqa, yanapachikunaykin. Chaypaq willakuwaq tayta-mamaykiman otaq allin confianza kuraq runaman. Biblian nin: “Tukuy tiempon amigoqa munakun, llaki-phutiy tiempopipas wayqe jinan khuyapayakun”, nispa (Proverbios 17:17).

Sonqonchispi imayna kasqanchismi aswan importanteqa. Chaypaq yachasunchis rey Davidpa wawan Absalonmanta. Paymantan Biblia nin:

‘Absalonqa munay sijllan karan. Manataqmi pipas pay jina ancha sumaq rijch’ayniyoqpas reqsisqapas karanchu’, nispa (2 Samuel 14:25).

Chhaynaña karan chaypas, payqa uma oqariq, payllapaq imatapas munaq, sinchi traicionero, runa wañuchiq iman karan. Chaymi Bibliaqa mana allinta paymanta willan.

Chayraykun Bibliaqa khaynata niwanchis:

“Diospa qosqan mosoq runa kaywan p’achawan jina churakuychis”, nispa (Colosenses 3:10).

“Ama jawallaykichispichu munay kasqaykichisqa rikukuchun, [...] aswanpas sonqoykichispi imaynachus kasqaykichispi rikukuchun munay kasqaykichisqa”, nispa (1 Pedro 3:3, 4).

Chhaynaqa, munaycha rikukuymantaqa imayna runa kasqanchismi aswan importanteqa. Arí, sonqoyki imayna kasqanmi munaytaqa rikuchisunki, manan uyaykichu nitaq cuerpoykipaschu. Chaymi Felícitas sutiyoq sipaspas nin: “Runakunaqa manan munay uyayoq kasqaykitachu mastaqa yuyarinqaku, aswanpas sumaq sonqo, allin runa kasqaykitan astawanqa yuyarinqaku”, nispa.

¿Millaypaqchu uyaykita cuerpoykitapas qhawarinki?

Aswan munaycha rikukunaykipaq, ¿jayk’aqllapas piensarankichu doctorwan operachikuyta otaq sinchi pisichallataña mijuyta?

¿Imaykitan cambiayta munawaq? (Chaykunata marcay).

• ¿SAYAYNIYKITA?

• ¿PESOYKITA?

• ¿CHUJCHAYKITA?

• ¿CUERPOYKITA?

• ¿UYAYKITA?

• ¿COLORNIYKITA?

Wichaypi tapuykunata “arí” nispa kutichiranki chayqa, kay último tapuypipas kinsata otaq mastapas marcaranki chayqa, kaytan yachanayki: Manapaschá jujkunaq qhawarinanpaqqa millaychu rikukunki, qanllapaschá millaypaqqa piensakushanki. Wakinqa rijch’ayninkumanta nishuta preocupakuspan mana allinpaq paykuna kikinkuta qhawarikunku (1 Samuel 16:7).