Diosqa munanmi amigon kananchista. ¡Qanqa Tukuy-atiyniyoq Diospa amigonmi kawaq! Abrahamqa Diospa amigonmi karan, payqa ñawpa tiempopi kawsaran (Santiago 2:23). Bibliaq willasqan hina huk runakunapas Diospa amigon karanku, askha saminchaykunatataq chaskiranku. Kunanpas, llapa suyukunamanta askha runakunan Diospa amigon kanku. Qanpas Diospa amigonmi kawaq.

Diospa amigon kayqa aswan allinmi runaq amigon kaymantaqa. Diosqa manan hayk’aqpas saqenmanchu hunt’aq sonqo amigonkunataqa (Salmo 18:25). Diospa amigon kayqa qhapaq kaykunamantapas aswan allinmi. Qhapaq runa wañuqtinqa hukkunan qolqenwan qhepanku. Diospa amigonkunan ichaqa, mana piqpa qechunan qhapaq kayta hap’inku (Mateo 6:​19).

Wakinqa manapaschá munanqakuchu Diosmanta yachanaykita. Amigoykikunapas familiaykikunapas hark’asunkimanmi (Mateo 10:36, 37). Pipas asipayasunki otaq manchachisunki chayqa, tapukuy: “¿Diostachu icha runatachu kusichiyta munani?” nispa. Kaypi yuyaymanay: ¿Kasukuwaqchu pipas: amaña mikhuychu, nisuqtiyki? Manan riki. Kawsanapaqqa mikhunanchismi. Diosqa qosunkimanmi wiñay kawsayta. Chay hinaqa, yachashallaypuni Diospa amigon kaymanta, amataq piwanpas hark’achikuychu (Juan 17:3, Edición 1988).