Wañuyqa mana kawsaymi. Misk’i puñuy hinan (Juan 11:11-14). Wañusqakunaqa manan uyarinkuchu, rikunkuchu, rimankuchu, manataq imatapas yuyankuchu (Eclesiastés 9:5, 10). Pantasqa religionkunaqa yachachinku: wañuqkunaqa hukniray kawsayman rinku machulankunawan kawsanankupaq, nispa. Biblian ichaqa mana chaytachu yachachin.

Wañuqkunaqa manan yanapawasunmanchu nitaq ñak’arichiwasunmanchu. Runakunaqa wañuqkunata kusichiyta munaspa imaymanata ruwanku, sacrificiokunatapas haywanku. Diosqa manan allintachu qhawan chay ruwaykunata, Satanaspa llullakuyninpi saphichakusqan rayku. Wañusqakunapas manan chaykunawanqa kusikunkuchu manaña kawsasqanku rayku. Wañuqkunataqa manan manchakunachu nitaq yupaychanachu. Diosllatan yupaychananchis (Mateo 4:10).

Wañuqkunaqa kawsarimunqan. Hamuq tiempopi Jehová Diosqa wañuqkunata rikch’arichinqa paraisopi kawsanankupaq (Juan 5:28, 29; Hechos 24:15). Diosqa wañuqkunata rikch’arichinmanmi imaynan noqanchispas punuqkunata rikch’arichinchis hinata (Marcos 5:22, 23, 41, 42).

Wañuqkunaqa kawsashallanmi nisqa yachachiyqa llullan, Satanasmi chaytaqa runakunaq yuyayninman churan. Satanasmi supayninkunapiwan runakunata q’otun: wañuqkunaq espiritunqa kawsashallanmi, onqoykunatapas huk sasachakuykunatapas paqarichinmi, nispa. Satanasqa q’otullantaq mosqoykunawan, rikhuriykunawanpas. Chaymi Jehová Diosqa manapuni munanchu wañuqkunawan rimanata (Deuteronomio 18:10-12).