Jehová Diosta reqsinapaqqa Bibliatan leenanchis. Diosmi ñawpaq tiempopi wakin runakunata akllaran yuyaychasqanta qelqanankupaq. Chay qelqasqankutan “Biblia” ninku. Bibliata leespan kunanqa Diosta reqsisunman. Chaypin tarinchis Jehová Diospa siminta otaq willakuyninta, chaymi Bibliataqa “Diospa Simin” nillankutaq. Jehová Diosqa cheqaqtan riman, “manan [...] llullakunchu”, chay rayku Bibliaq nisqanqa iñinapaq hinapuni (Hebreos 6:18). Chay hinaqa nisunman: Diospa Siminpin cheqaq-kayqa tarikun, nispa (Juan 17:17).

Bibliaqa Diosmanta sumaq regalo chaskisqanchismi. Munakuq taytaq, churinkunaman qelqasqan carta hinan. Willawanchismi Diospa kay Allpata sumaq paraisoman tukuchinanmanta. Nillantaqmi ñawpaqpi ruwasqanmanta, kunan tiempopi ruwasqanmanta, hamuq tiempopi kasukuq wawankunapaq ima ruwananmantapas. Chaymantapas yanapawanchis sasachakuyninchiskunata allichanapaq, kusisqa kawsanapaqpas (2 Timoteo 3:16, 17).

 Jehová Diospa testigonkunaqa Diospa amigonmi kanku; paykunan yanapasunki Bibliaq yachachisqanta entiendenaykipaq. Bibliamanta yachayta munani niqtiykiqa, gratisllan yachachisunkiku (Mateo 10:8). Hinaspapas, mink’asqan kashanki huñunakusqankuman rinaykipaq. Paykunaqa Dios yupaychana wasikunapin huñunakunku, chay wasikunatan sutichakun: Jehová Diospa testigonkunaq Huñunakunan Wasi, nispa. Huñunakuykunaman rispaqa Diosmanta astawan yachanki.

Diostaqa reqsisunman ruwasqankunapi yuyaymanaspa. Biblian nin: “Diosqa hanaq pachata kay pachatawan kamarqan”, nispa (Génesis 1:1). “Hanaq pachata” kamaspanmi Jehová Diosqa Intitapas kamallarantaq. ¿Imatan Inti yachachiwanchis Jehová Diosmanta? Ancha atiyniyoq kasqanta. Diosllan hatunkaray Intitaqa kamanman karan. Hinaspapas, yachachiwanchis Jehová Dios ancha yachayniyoq kasqanta. Intiqa qowashallanchismi ruphaytapas k’anchaytapas, yachaywan kamasqa kasqan rayku.

Jehová Diosqa munakuyninta rikuchiwanchis imaymana kamasqanpi. Qhawariy kay Allpapi imaymana niraq frutakuna kasqanta. Jehová Diosqa munaspaqa ch’ulla frutallata qowasunman karan otaq manapas. Ichaqa imaymana rikch’ayniyoq frutakunata qowanchis: hatunta, huch’uyta, imaymana colorniyoqta, misk’ita, p’osqota, hukniraykunatapas. Kaymi yachachiwanchis Jehová Dios munakuq kasqanta, hinallataq qoykukuq, hukkunapaq allin ruwaq, sumaq sonqo kasqantapas (Salmo 104:24).