Satanasmi supayninkunapiwan mana munankuchu Dios servinanchista. Paykunaqa llapa runakunata Diosmanta karunchayta munanku pantasqa religionwan (2 Corintios 11:13-15). Pantasqa religionqa manan cheqaqtachu Bibliamanta yachachin. Kurusqa papa hinan: qhawarinallapaqmi allin, ukhuntaq ichaqa mana valeq. Sasachakuymanmi churawasunman.

Jehová Diosqa cheqaqmi, manan chaskinchu pantasqa religionta. Religionpi umalliqkunan Jesustaqa wañuchiyta munaranku kay Allpapi kashaqtin. Paykunaqa yuyaykuranku Dios yupaychayninku allin kasqanta. Chaymi niqku: “Taytaykuqa sapan Diosllan”, nispa. ¿Allinmi niranchu Jesús? Manan. Aswanmi niran: “Qankunaqa saqraq wawankunan kankichis”, nispa (Juan 8:41, 44). Kunan p’unchaypas askha runakunan yuyanku Dios yupaychasqankuta, ichaqa Satanasta supayninkunatawan yupaychashanku (1 Corintios 10:20).

 Imaynan mana allin sach’api mana allin rurukuna kan, chhaynallataqmi pantasqa religionpipas mana allin runakuna kan. Kay pachaqa sasachakuykunawan hunt’a kashan runakunaq mana allin ruwasqan rayku. Kanmi qhelli hucha ruway, maqanakuy, suwakuy, sarunchay, runa wañuchiy, violaypas. Chhayna ruwaqkunapas religionniyoqmi kanku, ichaqa religionninku mana yachachinchu allin ruwaykunata. Mana allin ruwasqankuta mana saqespaqa manan Diospa amigonchu kankuman (Mateo 7:17, 18).

Pantasqa religionqa idolokunaman mañakuyta yachachin. Diosqa manan munanchu idolokunaman mañakunanchista. Razonwanmi chaytaqa niwanchis. ¿Munasunmanchu pipas noqanchiswan rimanantaqa fotonchiswan rimananta? ¿Chay runari amigonchischu kanman? Manan. Jehová Diosqa payllawan rimananchistan munan, manan runaq ruwasqan imagenkunawanchu (Éxodo 20:4, 5).

Pantasqa religionqa yachachin guerrapi wañuchinakuyta. Jesusqa Diospa amigonkunata kamachiran munanakunankupaq. Munakusqanchis runakunataqa manan wañuchisunmanchu (Juan 13:35). Manan millay runakunatapas wañuchisunmanchu. Jesuspa awqankuna hap’iqninña hamuqtinkupas, Jesusqa manan munaranchu yachachisqankuna hap’iqninkunawan maqanakunanta (Mateo 26:51, 52).

Pantasqa religionqa yachachin mana allin runakunaq infiernopi nak’arinanta. Biblian ichaqa yachachin, hucha rayku wañuy kasqanta (Romanos 6:23). Jehová Diosqa munakuqmi. Payqa manapunin runakunataqa wiñaypaq ñak’arichinmanchu. Paraisopiqa Jehová Diospa chaskisqan religionllan kanqa (Apocalipsis 15:4). Satanaspa llullakusqanta yachachiq religionkunataq chinkapunqa wiñaypaq.