Paraisoqa manan kay millay pacha hinachu kanqa. Diosqa manan hayk’aqpas munaranchu kay pachapi sasachakuykuna, nanaykuna, ñak’ariykuna kananta. Hamuq tiempopin Diosqa kay Allpata paraisoman tukuchinqa. ¿Imaynan chay paraíso kanqa? Biblian willawasun.

Allin runakuna. Paraisopiqa Diospa amigonkunan tiyanqaku. Paykunaqa sumaqta qhawarinakunqaku, Jehová Diospa chanin ñanninkunaman hinataq kawsanqaku (Proverbios 2:21).

Askha mikhuna kanqa. Paraisopiqa manan pipas yarqaymanta muchunqachu. Biblian nin: kay Allpapi ‘askhallaña trigo [otaq mikhuna] kanqa’, nispa (Salmo 72:16).

Allin wasikuna sumaq llank’anapas. Paraisopiqa llapa familiakuna wasiyoqkama kanqaku, lliwtaq kusisqa llank’anqaku (Isaías 65:21-23).

Pachantinpi thak kawsay. Manañan kanqañachu guerrapi maqanakuy wañuchinakuypas. Diospa Simin Qelqa nin: ‘[Diosmi] teqsimuyuntinpi  awqa-tinkuykunata [guerrakunata] qolluchinqa’, nispa (Salmo 46:8, 9).

Qhali kawsay. Biblian nin: “Manan mayqellanpas [Paraisopiqa]: ‘Onqosqan kani’, ninqachu”, nispa (Isaías 33:24). Manallataqmi kanqachu wist’ukunapas, ñawsakunapas, roqt’ukunapas, upakunapas (Isaías 35:5, 6).

Manan kanqachu llakikuypas, nanaypas, wañuypas. Diospa Simin Qelqa nin: “Manan wañuypas kanqañachu, manallataqmi llakikuypas, waqaypas, nanaypas kanqañachu, ñawpaqkaqkunaqa manaña kapusqanrayku”, nispa (Apocalipsis 21:4).

Manan millay runakunapas kanqañachu. Jehová Diosmi nin: “Millay runakunan ichaqa kay suyumanta [Allpamanta] wikch’usqa kanqaku, wasanchaqkunapas chaymanta t’irasqan kanqaku”, nispa (Proverbios 2:22).

Runakunaqa munanakunqaku, respetanakunqakutaq. Manan kanqañachu mana chanin ruwaqkuna, runa sarunchaqkuna, mich’akuqkuna, cheqninakuqkunapas. Runakunaqa hukllachasqan kawsanqaku, Diospa chanin ñanninkunaman hina (Isaías 26:9).