ISKAY iñiqmasikunan huk runaman estudiota qospanku huk textota leerqanku, chay qhepamanmi rikurqanku chay runaq ñawin kusikuymanta k’ancharisqanta, hinaspan paykunata nirqan: “Paraisopi wiñaypaq kawsananchismantaqa manan yacharqanichu. ¿Chaytachu Biblia yachachin?”, nispa. Huknin iñiqmasitaq kutichirqan: “¿Ima nishanmi chay texto leesqaykipi?”, nispa. Admirakuspan chay runa nirqan: “¿Imaraykutaq kaytari mana yachachiwarqankuchu?”, nispa. Chay runaqa chhaynallatataqmi nirqan Diospa sutin Jehová kasqanta yachaspapas.

¿Hayk’aqllapas chayta repararqankichu estudiota qoshaspa? Askhan chayta repararqanku. Chaykunan yuyarichiwanchis huk ancha valorniyoq regalota chaskisqanchista, chay regaloqa Bibliapi cheqaqta yachasqanchismi. Kayta tapukuy: “¿Imaynatan chay regalo ñoqaman chayamuwarqan?”, nispa. Kay t’aqapin chaymanta yachasun. Diospa llaqtan pisi-pisimanta cheqaq yachachikuykunata entiendesqanmi rikuchin Diospa gobiernon cheqaq kasqanta. 100 watañan rey Jesucristo Diospa llaqtanman cheqaqta yachachishan.