Jehová Diosta munakuqkuna:

Jesusmi niran: “Cheqaqkaqtan reqsinkichis, chay cheqaqkaqtaqmi kacharichisunkichispas”, nispa (Juan 8:32). Chay simikunaqa anchatan kallpachawanchis. Kay ‘tukukuy qaylla p’unchaykunapi’ sinchitaña llullakuy mast’arikushan chaypas tarisunmanmi chay cheqaq yachachikuyta (2 Timoteo 3:1). Yuyarishanchischá Diospa Siminpi cheqaq yachachikuykunata chayllaraq yachasqanchista. ¡Arí, ancha sumaq yachaykunatan yacharanchis!

Ichaqa manan yachayllachu yachananchis nitaqmi yachasqanchismanta willaqllapaschu kananchis. Chhaynaqa, ¿imatawantaq ruwananchisri? Yachasqanchisman hinan kawsananchis. Arí, Diospa munakuyninpin takyananchis. Ichaqa, ¿imatan ruwananchis Diospa munakuyninpi takyanapaq? Chaytan Jesús kutichiran wañuchinanku tuta qatikuqninkunaman kayta nisqanpi: “Kamachikuyniykunata hunt’ankichis chayqa, munakushallasqaykichispunin, imaynan Yayaypa kamachikuyninkunata hunt’aqtiy payqa munakuwan hinata”, nispa (Juan 15:10, Edición 1988).

¿Imatan Jesús ruwaran Diospa munakuyninpi takyananpaq? Taytanpa kamachikuyninkunatan kasukuran. Chaytan ñoqanchispas ruwananchis. Arí, Diospa munakuyninpi takyanapaqqa kamachikuyninkunaman hinan kawsananchis. Chay tutallataqmi Jesús kayta niran: “Kaykunata entiendespachus ruwankichis chayqa, kusisamiyoqmi kankichis”, nispa (Juan 13:17).

Kay libron ruwakun cheqaq yachachikuyman hina kawsananchispaq, kay libroq yanapayninwan ‘Diospa munakuyninpi allinta takyaspa [...] wiñay kawsay qowananchista suyakunapaq’, chaytan munayku tukuy sonqomanta (Judas 21).