1, 2. ¿Imaraykun Diosta munakunki?

 YAQAPASCHÁ Diosta munakusqaykirayku bautizakurankiña paypa amigon kanaykipaqtaq imaymanata ruwashanki. Jehová Diosmi ichaqa ñaupaqta munakuwaranchis. Biblian nin: “Noqanchisqa Diosta munakunchis ñaupaqtaraq pay munakuwasqanchisraykun”, nispa (1 Juan 4:19).

² Jehová Diosqa munakuwasqanchisraykun kay allpata tukuy imaymana necesitasqanchistapas qowaranchis kusisqa kausanapaq (Mateo 5:43-48; Apocalipsis 4:11). Diosqa munanmi amigon kananchista chaymi Bibliata qowaranchis, chayta leespan payta uyarishanchis paytaq uyariwanchis mañakuqtinchis (Salmos 65:2). Santo espiritunwantaq allin ñanninta pusawanchis (Lucas 11:13). Munakusqan wawantapas noqanchisraykun kachamuran wañuymanta juchamantawan librawananchispaq (leey Juan 3:16; Romanos 5:8).

3. ¿Imatan ruwana Jehová Dioswan amigollantin kananchispaq?

³ Munakusqanchis amigonchiswanqa allinpipas  mana allinpipas yanapanakunchismi. Amigontin kashanallapaqqa kallpachakunanchismi. Jehová Dioswanpas amigollantin kanapaqqa kallpachakunanchismi. Jinaspapas Dioswanqa atisunmanmi wiñaypaq amigontin kayta, chaymi Biblia nin: ‘Paypa munakuynillanpi kashaychis’, nispa (Judas 21). ¿Imaynatan chayta ruwasunman? Biblian kutichin: “Diosta munakuyqa kamachikuyninkunata kasukuymi; kamachikuyninkunaqa manataqmi sasa junt’aychu”, nispa (1 Juan 5:3).

4, 5. ¿Imaynapin Diosta munakuyta qallariranki?

⁴ Apóstol Juanmi rimaran Diosta munakuymanta. ¿Yuyashankichu imaynapi Dios munakuyta qallariranki chayta?

⁵ Diosqa munanmi kay allpapi wiñaypaq kausanaykita chaypaqmi tukuy imaymanata ruwaran, ancha munakusqan wawantapas noqanchisraykun kay allpaman kachamuran. Chaykunata yachaspaqa anchatachá kusikuranki (Mateo 20:28; Juan 8:29; Romanos 5:12, 18). Chaypin repararanki Jehová Dios anchata munakusqasuykita chhaynapin qanpas payta munakuyta qallariranki (leey 1 Juan 4:9, 10).

6. a) ¿Imaynatan rikuchinchis pitapas munakusqanchista? b) ¿Imatan ruwaranki Diosta munakusqaykirayku?

⁶ Ichaqa manan simillaykiwanchu Dios munakusqaykitaqa rikuchiranki. Pitapas munakuspaqa manan simillanchiswanchu “munakuykin” nispaqa  ninchis, aswanpas imakunachus kusichisqantan ruwanchis. Chay jinallataqmi Dioswanpas. Payta munakusqaykiraykun munasqanman jina kausayta qallariranki astawan munakuqtiykitaq payman prometekuranki payllapaqña kausanaykipaq jinaspa bautizakuranki (leey Romanos 14:7, 8). ¿Iman yanapasunkiman chay prometesqaykita cumplinaykipaq?

7. a) Diosta munakunchis chayqa, ¿imatan ruwananchis? b) ¿Imakunatan Dios mana munanchu ruwananchista?

⁷ Diosta munakusqanchistan rikuchinchis ‘kamachikuyninkunata kasukuspa’. Bibliapin Dios willawanchis imayna kausananchista. Ejemplopaq, payqa niwanchismi machay, suwakuy, llullakuy, qhelli juchapi puriy, idolokunata adoraypas mana allinchu kasqanta (1 Corintios 5:11; 6:18; 10:14; Efesios 4:28; Colosenses 3:9).

8, 9. Imata ruwanapaqpas Bibliapi juj kamachikuy mana kaqtin, ¿imaynatan allinta decidisunman? Juj ejemplota willay.

⁸ Diosmi ichaqa mana tukuyta ruwananchispaqchu kamachikuykunata qowaranchis. Chhaynaqa, ¿imaynatan imatapas allinta decidisunman? (Efesios 5:17.) Bibliapin tarinchis Diospa yachachikuyninkunata, chay yachachikuykunata estudiaspan yachasun imayna Dios kasqanta, imayna piensasqanta, imata cheqnikusqanta, imata munakusqantapas (leey Salmos 97:10; Proverbios 6:16-19; qhaway 1 willakuyta).

 ⁹ Ejemplopaq, kunan tiempopiqa televisionpipas internetpipas qhelli jucha ruwaykuna maqanakuykunan masta rikukun. Chhaynaqa, ¿iman yanapawasun imatas qhawasunman chayta decidinapaq? Diosqa manan niwanchischu; ichaqa qowanchismi yachachikuyninkunata chayman jina allinta decidinapaq. Biblian willan ‘maqaylla maqaqkunata Dios cheqnikusqanta’ ‘qhelli juchapi puriqkunatapas juchachananta’ (Salmos 11:5; Hebreos 13:4). Chay yachachikuykunan reparachiwanchis Diosqa chay ruwaykunata cheqnikusqanta, chhaynaqa manan chaykunata qhawananchischu.

10, 11. ¿Imaraykun Diosta kasukunchis?

¹⁰ ¿Imaraykun Diosta kasukunchis? Manan castigasqa kayta manchakuspallachu nitaq mana allinpi tarikunanchisraykullachu (Gálatas 6:7). Aswanpas Diosta munakusqanchisraykun. Imaynan juj wawapas taytanta kusichiyta munan, chhaynatan noqanchispas Diosta kusichiyta munanchis. Noqanchispaqqa Diospa sumaq qhawarisqan kaymi imamantapas aswan allinqa (Salmos 5:12; Proverbios 12:2; qhaway 2 willakuyta).

¹¹ Sasaña kaqtinpas Jehová Diostaqa kasukunchismi. Manataqmi noqanchischu ajllakunchis ima kamachikuykunatas kasukusun imatas mana chaytaqa (Deuteronomio 12:32). Aswanpas tukuypin kasukunchis, Salmos qelqaq jinan ninchis: “Kamachikuyniykikunan kusichiwan, chaykunatan munakuni”, nispa (Salmos 119:47; Romanos 6:17). Noé jinan  kayta munanchis, payqa Diosta munakusqanraykun tukuypi kasukuran. Biblian nin: “Noetaq Diospa tukuy kamachisqanman jina ruwaran”, nispa (Génesis 6:22). ¿Munawaqchu qanmantapas chhayna ninanta?

12. ¿Imaynatan Diosta kusichisunman?

¹² ¿Imaynan Dios sientekun kasukuqtinchis? Anchatan kusikun (Proverbios 11:20; 27:11). ¡May munaymi kamaqninchista kusichiyqa! Diosmi ichaqa mana obligawanchischu kasukunanchispaq. Aswanpas sapankanchistan kamawaranchis noqallanchismanta imatapas decidinanchispaq. Diosqa munanmi payta munakusqanchisrayku imatapas decidinanchista, chhaynapin sumaqta kausasun (Deuteronomio 30:15, 16, 19, 20; qhaway 3 willakuyta).

13, 14. Diospa kamachikuyninkunaqa manan sasa junt’aychu, ¿imaynapin chayta yachanchis? Juj ejemplota willay.

¹³ Nisunmanpaschá: “Diospa kamachikuyninkunaqa sasa junt’aymi, ima ruwanaytapas jark’awanmi”, nispa. Ichaqa, ¿cheqaqchu chay kanman? Manan. Biblian nin: ‘Diospa kamachikuyninkunaqa manan sasa junt’aychu’, nispa (1 Juan 5:3). Wakin textokunapin sasa junt’ay palabrata utilizakun mana cumpliy atina kamachikuykunamanta, mana khuyapayakuspa kamachiq runamantawan. Diospa kamachikuyninkunan ichaqa mana chhaynachu (Mateo 23:4; Hechos 20:29, 30). Chaymi Pedro  Ortiz traducisqan Bibliapi nin: “Diospa kamachikuyninkunaqa manan llasa q’epichu”, nispa. Chhaynaqa Diospa kamachikuyninkunaqa kasukuy atiyllan.

¹⁴ Chayta entiendenapaq kay ejemplopi piensay. Amigoykin wasinmanta astakushan qantaq cajankuna apaypi yanapashanki. Amigoykiqa munakusqasuykiraykun mana munanchu llasa cajakuna apanaykita, aswanpas atinallayki cajakunata apanaykipaqmi nisunki, chhaynapi mana ima dañotapas ruwakunaykipaq. Jehová Diospas amigonchismi, payqa manan jayk’aqpas mana atinanchistaqa kamachiwasunmanchu (Deuteronomio 30:11-14). ‘Reqsiwanchistaqmi imayna kasqanchista, yuyarintaqmi ñut’u allpa kasqanchistapas’ (Salmos 103:14).

15. ¿Imaynapin yachanchis Diospa kamachikuyninkuna allinninchispaq kasqanta?

¹⁵ Moisesmi Israel runakunata niran: ‘Diospa kamachikuyninkunata kasukuspaqa allinmi kankichis unaytataqmi kausankichis’, nispa (Deuteronomio 5:28-33; 6:24). Kunan tiempopipas Diospa kamachikuyninkunaqa yanapawanchismi allinta kausananchispaq (leey Isaías 48:17). Jehová Diosqa yachanmi imachus allinninchispaq kasqanta (Romanos 11:33). Jinaspapas Biblian nin: “Diosqa munakuymi”, nispa (1 Juan 4:8). Chaymi Jehová Diosqa munakuwasqanchisrayku imatapas niwanchis imatapas ruwan.

16. ¿Imakunan yanapawasunman Jehová Diosta kasukunanchispaq?

 ¹⁶ Mayninpiqa sasan kanman Diospa kamachikuyninkunata kasukuy, ¿imarayku? Satanás kay pachata kamachisqanrayku, paymi runakunata tanqan mana allinkunata ruwanankupaq (1 Juan 5:19). Chaymantapas juchayoq runan kanchis. Chaymi piensasqanchis ima munasqanchispas tanqawasunman Diosta mana kasukunanchispaq (Romanos 7:21-25). Ichaqa Diosta munakusqanchismi kallpachawasun allin kaqta ruwanapaq. Diosqa anchatan valoran payta kasukunapaq kallpachakusqanchista, chaymi santo espiritunta qowanchis sumaq runa kananchispaq chaypas yanapawasunmi Diosta kasukunapaq (1 Samuel 15:22, 23; Hechos 5:32; Gálatas 5:22, 23).

17, 18. a) ¿Imatan kay libropi yachasun? b) ¿Imatan qatimuq estudiopi yachasun?

¹⁷ Kay libropin yachasun Diospa yachachikuyninkunaman kamachikuyninkunaman jina kausayta. Ama qonqaychu, Diosqa manan obligawanchischu payta kasukunanchispaq. Sichus noqallanchismanta Diosta kasukusun chayqa, sumaqtan kausasun kunanpas jamuq tiempopipas. Astawanqa tukuy sonqowan Diosta munakusqanchistan rikuchisun (qhaway 4 willakuyta).

¹⁸ Jehová Diosmi concienciata qowaranchis allin kaqta mana allin kaqta reparananchispaq. Sichus conciencianchista educasun chayqa, yanapawasunmi Diosta kasukunanchispaq. Qatimuq estudiopin yachasun concienciamanta, imaynatas educasunman chaymantawan.